Një ngjarje e rëndë ka ndodhur këtë të enjte në zonën e Qerretit, Kavajë, ku një 62-vjeçar ka humbur jetën gjatë punës në një kantier ndërtimi. Sipas informacioneve paraprake, rreth orës 15:30, shtetasi I. P., është dërguar pa shenja jete në Urgjencën e Spitalit Rajonal Durrës.
Dyshohet se 62-vjeçari ka ndërruar jetë pasi është goditur nga rrëzimi i një trari prej druri gjatë procesit të çmontimit të skelave. Nga ky incident është lënduar lehtë edhe një tjetër punonjës, shtetasi me iniciale S. H., i cili ka pësuar dëmtime në këmbë.
Në lidhje me ngjarjen, policia ka shoqëruar disa nga personat që ndodheshin në vendin e aksidentit për të dhënë deklarimet e tyre. Grupi hetimor ndodhet në vendngjarje dhe, nën drejtimin e Prokurorisë, po punon për të zbardhur plotësisht rrethanat e kësaj tragjedie.
