Një tjetër tragjedi në vendin e punës është shënuar mëngjesin e 19 majit në komunën Vernio, pranë Pratos në Itali.
Viktima është një punëtor shqiptar, 56 vjeç, i cili humbi jetën pasi u shtyp nga një kamion ndërtimi në zonën “via del Bisenzio”, në fshatin Mercatale.
Sipas mediave italiane, mjeti humbi papritur tërheqjen në asfalt dhe lëvizi në mënyrë të pakontrolluar, duke e goditur punëtorin.
Mjeti e goditi punëtorin duke i shkaktuar vdekjen e menjëhershme, më pas përfundoi në një kanal buzë rrugës. Ngjarja ndodhi rreth orës 11:00 paradite.
Punëtori ishte i angazhuar në një kompani që punonte për llogari të Hekurudhave Shtetërore italiane. Ndërhyrja e shpejtë e ambulancës 118 dhe shërbimeve të emergjencës nuk arriti të shpëtojë jetën e tij.
Në vendngjarje mbërritën gjithashtu zjarrfikësit, karabinierët, policia bashkiake dhe inspektorët e ASL Centro për të hetuar shkaqet.
Prokuroria e Pratos, nën drejtimin e prokurorit Luca Tescaroli, ka hapur hetim për vrasje nga pakujdesia.
Janë sekuestruar kamioni dhe zona ku ndodhi aksidenti, ndërsa po zhvillohet një inspektim i detajuar për të rindërtuar ngjarjen dhe për të përcaktuar përgjegjësit penalë.
