Një ngjarje e rëndë ka tronditur qytetin e Peruxhias dhe komunitetin shqiptar në Itali, ku një i ri shqiptar humbi jetën në rrethana tragjike.
Hekuran Cumani, 23 vjeç, me origjinë shqiptare dhe banues në Fabriano të provincës së Anconës, u vra me thikë në orët e para të së shtunës në një parking pranë Universitetit të Peruxhias. Sipas hetimeve paraprake të Prokurorisë, krimi është klasifikuar si “vrasje me dashje”, që dyshohet të ketë ndodhur pas një grindjeje për arsye të konsideruara “të parëndësishme”.
I riu u godit me thikë në fyt dhe në gjoks, plagë që i shkaktuan vdekjen e menjëhershme. Pavarësisht ndërhyrjes së shpejtë të ambulancës dhe policisë, Hekurani kishte ndërruar jetë në vendngjarje.
Sipas raportimeve të para, ai kishte udhëtuar drejt Peruxhias për t’u argëtuar me miqtë e tij. Debati fatal nisi jashtë lokalit të njohur “110 Caffè”, që ndodhet pranë Departamentit të Matematikës dhe Shkencave Kompjuterike të universitetit. Përplasja verbale mes dy grupeve të të rinjve degjeneroi në përleshje fizike, gjatë së cilës një person, ende i paidentifikuar nga policia italiane, e goditi Cumanin me thikë duke i marrë jetën.
Miqtë e tij, të tronditur nga ngjarja, e kanë përshkruar Hekuranin si një djalë të qetë, të dashur dhe të përkushtuar ndaj palestrës e stilit të shëndetshëm të jetesës. “Ai e donte trupin e tij, i pëlqente palestra dhe fitnesi. Ishte një mik i mirë, i dashur me familjen dhe kafshët,” – deklaroi një prej miqve të tij për mediat italiane.
Hetuesit kanë marrë në pyetje të gjithë personat e pranishëm në momentin e ngjarjes, ndërsa pamjet e kamerave të sigurisë përreth zonës po analizohen për të identifikuar autorin e krimit.
Lajmi i rëndë ka prekur thellë edhe autoritetet lokale të Peruxhias. Në një deklaratë të përbashkët, kryetari i bashkisë dhe Këshilli Komunal shprehën ngushëllime për familjen dhe miqtë e të ndjerit:
“Lajmi na ka tronditur të gjithëve. Ne qëndrojmë pranë familjes dhe miqve të tij, të cilët po përjetojnë një dhimbje të padurueshme. Është e vështirë të pranohet që një jetë kaq e re të ndërpritet në mënyrë kaq të dhunshme. Dhimbja e këtyre orëve shtrihet në të gjithë qytetin. Peruxhia qëndron me ata që po vuajnë sot dhe reflekton, me hidhërim, për një tragjedi që na prek të gjithëve.”
