Gjykata e Tiranës ka vendosur masën e sigurisë “arrest me burg” për tetë persona të arrestuar për shitblerje armësh, duke pranuar kërkesën e paraqitur nga Prokuroria.
Në seancën gjyqësore, të dyshuarit, Emirel Tusha, Leandro Haxhiaj, Fabricio Berberi, Rikardo Hajdaraj, Visar Murati, Kevin Farruku, Geraldo Muraj dhe Adriano Shehu nuk dhanë asnjë deklaratë para trupës gjykuese.
Ndërkohë, mbrojtja ngriti pretendime për shkelje proceduriale, duke akuzuar autoritetet se kishin përdorur blerje të stimuluara, me qëllim nxitjen e të pandehurve në veprime të paligjshme.
Avokatët kërkuan që gjykata të merrte në konsideratë mungesën e precedentëve penalë për secilin prej tyre, si dhe kërkuan paraqitjen e provave të qarta për rolin individual të të dyshuarve në aktivitetin kriminal.
Po ashtu, u kërkuan edhe akt-ekspertizat për të verifikuar nëse armët e sekuestruara ishin funksionale.
Nga ana e saj, Prokuroria paraqiti akt-ekspertiza mbi armët e kapura më herët gjatë arrestimit të Altin Pajazitit dhe Kadri Prushit, ku një prej armëve rezultoi jashtë funksionit.
Gjatë operacionit, strukturat e rendit sekuestruan 14 armë zjarri (mes tyre 12 pistoleta, një me silenciator dhe 2 automatikë), 2,077 fara cannabisi, krehra dhe municion luftarak, tre automjete dhe tetë celularë.
Hetimet vijojnë për të identifikuar të gjithë rrjetin e përfshirë në këtë veprimtari të paligjshme.
