Shqipëria ka vijuar të mbetet shteti i Europës me numrin më të ulët të veturave për pasagjerë në raport me popullsisë, sipas të dhënave të fundit të publikuara nga Eurostat dhe që i përkasin vitit 2021.
Në Shqipëri kishte 210 autovetura për 1000 banorë, sipas Eurostat, nga 190 që ishte treguesi vitin e mëparshëm. Pavarësisht rritjes, vendi mbetet i fundit në Europë për numrin e autoveturave në raport me popullsinë (të dhënat për Kosovën dhe Turqinë dhe Bosnjën nuk janë të disponueshme).
Pas Shqipërisë renditet Maqedonia e Veriut, me 231 mjete, ndërsa rekordin e mban Serbia, me 325 autovetura.
Banorët e rajonit disponojnë shumë më pak automjete personale në krahasim me vendet e Bashkimit Europian. Në shtetet e BE-së treguesi fillon nga 400 eurovetura. Mesatarja e Bashkimit Europian është 570 autovetura për një mijë banorë.
Numri i makinave për banor në Europë është rritur në vitin 2021
Eurostat raportoi se në vitin 2021, numri mesatar i makinave të pasagjerëve për banor në Bashkimin Europian, u rrit nga 0,53 në 0,57.
Të dhënat tregojnë se vendet perëndimore të BE-së, regjistruan norma më të larta të motorizimit (makina pasagjerësh për 1000 banorë), sesa anëtarët qendrorë dhe lindorë të BE-së. Megjithatë, në nivel rajonal, kishte pabarazi të konsiderueshme në pronësinë e makinave brenda BE-së.
Normat rajonale shpesh lidhen me situatën ekonomike, por mund të ndikohen edhe nga rrethana specifike. Për shembull, shkalla e lartë e motorizimit në Valle d’Aosta (Itali), ndikohet nga rregullat e favorshme tatimore.
Midis viteve 2001 dhe 2021, Rumania regjistroi normën më të lartë mesatare vjetore të rritjes së makinave të pasagjerëve për 1 000 banorë midis vendeve anëtare të BE-së (+5,4%), e ndjekur nga Polonia (+4,5%).
Vendet që shënuan norma mesatare vjetore të rritjes nën 1%, ishin Malta dhe Holanda (secila +0,9%), Spanja (+0,8%), Franca dhe Italia (secila +0,7%), Belgjika dhe Austria (secila +0,5%), Gjermania dhe Luksemburgu (secila +0.4%) dhe Suedia (+0.3%)
Në përgjithësi, vendet baltike, vendet e Europës Lindore dhe Qendrore, kanë regjistruar rritje më të forta se vendet perëndimore të BE-së midis 2001 dhe 2021. /Monitor
