Prokuroria e Tiranës ka hetuar në bashkëpunim me homologët e saj në Zvicër, për një rrjet trafikantësh droge, ku kanë rezultuar të përfshirë edhe dy shqiptarë. Mësohet se hetimet në vendin tonë kanë nisur pas një kërkesë nga autoritetet zvicerane, të cilat kishin pasur indicie për përfshirjen e shqiptarëve në këtë rrjet trafikantësh. Sipas hetimeve të kryera nga Prokuroria e Rrethit Gjyqësor Tiranë, ka arritur ti identifikojë dy personat e përfshirë në trafikimin e lëndëve narkotike për një grup të hetuar dhe të dënuar në Zvicër.
Sipas “BalkanWeb” në pranga ka përfunduar shtetasi Ndriçim Harka, punonjës në Bashkinë e Tiranës, i cili dyshohet se është kryesuesi i grupit të trafikantëve. Sipas provave të administruara rezulton se shtetasit Etmond Merja dhe Ndriçim Harka janë të përfshirë si organizatorë në këtë veprimtari kriminale.
Provat janë administruar me anë të letër-porosisë dhe veprimeve të tjera. Etmond Merja i shpallur në kërkim është kunati i Harkës, i cili dyshohet se është larguar drejt Greqisë. Gjithsej janë 7 persona pjesë e grupit, 5 prej tyre të arrestuar në Zvicër.
Gjithashtu është mësuar se bisedat mes trafikantëve janë kryer nga numra celularë shqiptarë dhe se trafiku kryhej që në vitin 2015. Mësohet se i gjithë aktiviteti është arritur të zbardhej me përgjime ndaj grupit.
