Nis sot rigjykimi për Moisi Habilajn dhe anëtarët e grupit të trafikut të kanabisit në Gjykatën e Posaçme.
Habilaj, i dyshuar si drejtues i një grupi kriminal që trafikonte kanabis nga Shqipëria në Itali, është i dënuar me 10 vite burg nga Gjykata e Shkallës së Parë në vitin 2021. Ky dënim, së bashku me të tre të akuzuarve të tjerë, Nezar Seiti, Meridian Sulaj dhe Fatmir Minaj, u prish nga Apeli i Posaçëm në mars 2023, që vendosi rigjykim me një trupë të re gjyqësore.
Në vitin 2021, GJKKO dënoi Habilajn për trafik droge dhe organizim grupi kriminal, duke i dhënë 10 vite burg, ndërsa kërkesa e SPAK për 15 vite burg mbeti pa efekt. Po ashtu, të tre të akuzuarit e tjerë u dënuan me nga 9 vite burg për trafik droge dhe përfituan nga gjykimi i shkurtuar.
Grupi i trafikut u zbulua pas kapjes së 4 ton kanabis në një vilë në Babicë të Vlorës në tetor të vitit 2017. Pas këtij aksioni, SPAK kërkoi dënimin maksimal prej 63 viteve burg për të katër të pandehurit, por përfituan një ulje të dënimit prej 1/3.
Moisi Habilaj është aktualisht në arrati dhe është gjithashtu i dënuar në Itali me 15 vite e 5 muaj burg për trafik ndërkombëtar të drogës. Ai u arratis nga banesa ku ndodhej në masë sigurie, dhe autoritetet italiane kërkojnë nga Shqipëria që të vazhdojnë kontrollet për ta gjetur.
Meridian Sulaj po vuan dënimin në Itali, ndërsa Nezar Seiti u arrestua në Shqipëri dhe më pas u ekstradua në Itali për të vijuar gjykimin.
Rigjykimi pritet të sjellë zhvillime të reja për këto akuza të rënda që lidhin Shqipërinë dhe Italinë në trafikun e lëndëve narkotike.
