Policia ka zbardhur dy ngjarjet kriminale në Durrës ku mbetën të vrarë vëllezërit Besmir dhe Viktor Haxhia, si dhe atentatin nda Dorian Shkozës dhe Anxhelo Avdias më 2 mars.
Në një deklaratë për mediat, kreu i Policisë së Shtetit, Ardi Veliu, bëri me dije se mekanizmi i përdorur në dy vrasjet është njëjtë.
Si autor të dyshuar për atentatin e pak ditëve më parë, u arrestuan Altin Ndoci 32 vjeç dhe K.A. 22 vjeç.
Ndoci është një emër i njohur për drejtësinë shqiptare, pasi ka pasur precendentë penalë edhe në të shkuarën.
Ai u vu në pranga në vitin 2015, pasi një sërë grabitjesh automjetesh në Tiranë.
Ndoci dhe 28-vjeçari Sazan Cibaku asokohe ishin kthyer në një tmerr për pronarët e mjeteve në kryeqytet.
Gjatë arrestimit në 2015-ën, atyre iu gjetën dhe sekuestruan tre pistoleta, maska të ndryshme, dy radio marrëse, jelek multifunksional, një sërë çelësa automjetesh, tabelë dore me mbishkriminin “Ministria e Financave”, shkopinj metalik, një valixhe e zezë me vegla si dhe çanta sportive, telefona të ndryshme celularësh dhe karta telefoni.
Njëkohësisht Altin Ndoci rezulton i dënuar edhe për trafik narkotikësh.
Pavarësisht veprave penale që rëndojnë mbi të, 33-vjeçar arriti që t’i shpëtonte burgut.
Së bashku me K.A. ai arriti të ekzekutonte dy vëllezërit Besmir dhe Viktor Haxhia pak ditë më parë në Durrës, ndërsa është i përfshirë edhe në atentatin ndaj Anxhelo Avdias dhe Dorian Shkozës më 2 mars, po në qytetin e Durrësit.
Sipas policisë, të dy ekzekutimet lidhen me prishjen e pazareve të drogës.
