Prokuroria e Posaçme kundër Korrupsionit dhe Krimit të Organizuar përfundoi hetimet dhe ka dërguar në gjykatë procedimin penal nr. 108 të vitit 2024 pranë Gjykatës së Posaçme të Shkallës së Parë, ndaj të pandehurve kryesorë në këtë çështje.
Në mesin e tyre është Gëzim Bakalli, i njohur me nofkën “Shkembim Cërmanji”, i akuzuar për trafikim të lëndëve narkotike në formën e grupit të strukturuar kriminal, në 15 episode të ndryshme.
Ai akuzohet gjithashtu për drejtimin e këtij grupi kriminal, falsifikim dokumentesh, përfshirë patentën, pasaportën dhe kartën e identitetit kosovar.
Po ashtu, në këtë procedim penal figuron edhe Erjon Loci, i akuzuar për prodhim dhe shitje të narkotikëve në kuadër të grupit të strukturuar kriminal, me 6 episode të regjistruara, si dhe për pjesëmarrje në grup kriminal.
Hetimet janë realizuar në bashkëpunim të ngushtë me autoritetet zvicerane, Byronë Kombëtare të Hetimit dhe strukturat e Policisë së Shtetit në Shqipëri.
Prokuroria e Kantonit të Solothurnit në Zvicër ka vijuar hetimet për një grup kriminal që gjatë viteve 2018-2024 ka importuar dhe tregtuar sasi të mëdha kokainë, heroinë, marijuanë dhe ecstasy, kryesisht të siguruara nga Amerika Latine dhe Gjermania. Këto substanca janë shpërndarë kryesisht në rajonin e Solothurnit dhe vende të tjera.
Përmes metodave speciale hetimore, autoritetet e dy vendeve identifikuan 12 persona të përfshirë në këtë rrjet kriminal, përfshirë shtetas shqiptarë, zviceranë, turq dhe italianë. Zvicra ka proceduar 10 persona nga ky grup.
Për të mbledhur prova mbi aktivitetin e paligjshëm në Zvicër, janë kryer një seri veprimesh hetimore që kanë konfirmuar se të pandehurit Bakalli dhe Loci kanë qenë pjesë aktive të këtij rrjeti kriminal, duke kordinuar mes tyre edhe përmes aplikacioneve të enkriptuara “Sky ECC”, “Threma” dhe “Signal”.
Gëzim Bakalli dyshohet të ketë qenë drejtuesi dhe financuesi i grupit, ndërsa Erjon Loci është përfshirë në transportin dhe shitjen e drogës në Zvicër.
Gjatë kontrolleve të kryera në Shqipëri dhe Zvicër janë sekuestruar:
• 22.25 kg heroinë me pastërti nga 30.7% deri në 62%,
• 345.4 kg kokainë me pastërti nga 44.2% deri në 86.9%,
• 1,000 kg kokainë në tentativë për të kaluar,
• 2 kg marijuanë,
• 10,000 tableta ecstasy,
• Dy armë zjarri (SIG 210 dhe SIG 220) me municion,
• Orë dore “Rolex” dhe “Hublot”,
• Pajisje regjistrimi,
• Kapuçë maskimi,
• Dokumente të ndryshme, përfshirë kontrata pronash,
• Karta bankare dhe gjashtë telefona celularë.
Për të identifikuar bashkëpunëtorë të tjerë, prokuroria ka hapur një procedim të ri me numër 108/1 të vitit 2025, ku hetimet vazhdojnë ende.
