Policia dhe Prokuroria e Fierit kanë finalizuar një operacion të mirëorganizuar që çoi në shkatërrimin e një grupi kriminal të dyshuar për trafik armësh dhe veprimtari të tjera të paligjshme.
Në një konferencë për shtyp, autoritetet konfirmuan arrestimin e katër personave me rrezikshmëri të lartë shoqërore, Boran Buzi, Niko Osma, Qamil Shurdhi dhe Besim Buzi.
Hetimet kanë zbuluar se grupi trafikonte armë zjarri dhe municione të ndryshme, një pjesë e të cilave dyshohet se janë siguruar nga Kosova dhe më pas shpërndaheshin në qytete të ndryshme të Shqipërisë për qëllime kriminale. Përveç trafikut të armëve, grupi ishte përfshirë edhe në kultivimin dhe shpërndarjen e lëndëve narkotike.
Gjatë kontrolleve në banesa, magazina dhe ambiente të tjera, u sekuestruan rreth 4 mijë bimë kanabisi , 2 mijë të mbjella në një parcelë dhe 2 mijë të tjera në kubikë. Gjithashtu, u gjetën dhe sekuestruan 3 armë automatike, 2 armë gjahu, mbi 600 fishekë, 5 mijë fara kanabisi, 2 radio policie, një uniformë policie, një maskë plastike, 3 automjete dhe 10 celularë.
Sipas policisë, ky aktivitet kriminal kishte shtrirje të gjerë dhe funksiononte me logjikën e një rrjeti të strukturuar, ku trafiku i armëve dhe narkotikëve kryhej paralelisht. Kontrollet përfshinë gjithsej 8 biznese dhe ambiente të dyshuara për magazinimin e armëve apo mbjelljen e bimëve narkotike.
Autoritetet njoftojnë se hetimet vijojnë për të identifikuar bashkëpunëtorë të tjerë të këtij rrjeti dhe për të zbardhur plotësisht itinerarin e furnizimit me armë.
