Ky është vetëm fillimi i një beteje të humbur. Katër euro për 17 kilometra – kaq do të paguajnë shqiptarët për të kaluar në segmentin e ri Milot-Balldren, një rrugë pa tunele dhe pa vepra të jashtëzakonshme arti. Një tjetër koncesion gjigant që do të varfërojë qytetarët për të pasuruar një grusht oligarkësh të pangopur.
Rama dhe Berisha, në skenë luajnë rolin e armiqve të betuar, por në prapaskenë bashkëpunimi i tyre është i përsosur. Asnjëri nuk denoncon koncesionet miliardëshe. Asnjëri nuk përmend emrat e oligarkëve si Bashkim Ulaj që po pasurohen nga këto koncesione. Asnjëri nuk del në krah të qytetarëve që protestojnë. Qeveria firmos kontratat grabitqare, opozita hesht. Kur vjen puna për të mbrojtur oligarkët, Rama dhe Berisha flasin të njëjtën gjuhë – gjuhën e heshtjes.
Ministria e Infrastrukturës sapo ka hedhur helmin e ri: një tender 364.7 milionë euro për një segment që do të jepet me koncesion për 35 vite. Por kjo shifër marramendëse është thjesht një mashtrim fillestar. Kostoja reale që do të paguajnë shqiptarët në këto 35 vjet do të tejkalojë 1 miliardë euro. Një grabitje e pastër që fillon me fryrjen artificiale të shpenzimeve dhe përfundon me xhepat bosh të qytetarëve.
Skema është një kopje e zezë e koncesionit famëkeq Thumanë-Kashar. Gener 2 e Bashkim Ulajt, kompania e preferuar e pushtetit, filloi me një projekt 225.8 milionë euro në 2018, e fryu në 457 milionë, për të arritur më pas shifrën marramendëse prej 1.3 miliardë eurosh. Një kosto që do të ishte në realitet jo më shumë se 50 milionë euro po të bëhej në mënyrë të ndershme. Por ku janë protestat e opozitës? Ku janë denoncimet për këtë grabitje të hapur?
Me këto tarifa grabitqare, veriu i Shqipërisë po dënohet me izolim ekonomik të përjetshëm. Një qytetar i thjeshtë shkodran që guxon të udhëtojë drejt Tiranës do të paguajë minimalisht 7.5 euro vetëm për të mbërritur në kryeqytet – 4 euro nga Balldreni në Milot dhe 3.3 euro nga Miloti në Kashar. Por kjo është vetëm pjesa e dukshme e akullnajës. Me ndërtimin e segmentit Balldren-Shkodër, që padyshim do të jepet me të njëjtën skemë koncesionare, kostoja totale e udhëtimit Shkodër-Tiranë do të arrijë në 25 euro vajtje-ardhje.
Skandali bëhet edhe më i thellë kur shohim se tarifat e vendosura nga qeveria jonë janë gati dy herë më të larta se në vendet e zhvilluara të Bashkimit Europian. Ndërsa në BE qytetarët paguajnë mesatarisht 0.07 euro për kilometër, qeveria “socialiste” ka vendosur një tarifë prej 0.12 euro për kilometër. Asnjë fjalë nga opozita për këtë diferencë skandaloze çmimi.
Në këtë sistem të kalbur, PS dhe PD kanë ndarë rolet në mënyrë të përkryer. Njëra parti firmos kontratat me oligarkët, tjetra hesht për emrat e tyre. Njëra jep koncesionet, tjetra mbyll sytë. As protestat e banorëve nuk i dëgjojnë, as kërkesat e qytetarëve nuk i përfillin. Kanë vetëm një detyrë – të mbrojnë interesat e oligarkëve që i mbajnë në pushtet.
Historia e koncesioneve të rrugëve është kronika e zezë e një grabitjeje të organizuar ku qeveria dhe opozita bashkëpunojnë në heshtje. Nga Thumanë-Kashar te Milot-Balldren, skema është një skemë e tmerrshme që përsëritet: kostot fryhen si balona, koncesionet jepen te të preferuarit, tarifat vendosen stratosferike dhe populli paguan deri në pikën e fundit të gjakut. Ndërsa oligarkët numërojnë miliardat e fituara nga këto koncesione, politikanët numërojnë heshtjet e tyre të arta.
/gazetareforma.com
