Një tjetër skandal është bërë publik nga Aeroporti i Rinasit dhe këtë herë lidhet me vjedhjen e valixheve të udhëtarëve.
Një investigim i Report TV, ka arritur të zbardhë skemën e grabitjeve të sendeve me vlerë ose të parave nga valixhet e udhëtarëve , gjë për të cilën edhe policia iu ka bërë një kërkesë kompanive ajrore.
Në këtë kërkesë, kërkohet që të monitorohen kamerat dhe valixhet të futen në kontenierë në mënyrë që punonjësit e ngarkim-shkarkimit mos të kenë kontakt me to.
Duhet të theksojmë se punonjësit që kanë këtë detyrë, pra ngarkim- shkarkimin i përkasin TIA-s, kompanisë e cila ka në mbrojtje aeroprotin, ku edhe u vodhen 6.5 mln eurot një javë më parë.
Sipas Report TV nuk kanë qenë të pakta denoncimet e qytetarëve për humbjen e sendeve të tyre, të tilla si tablete, celularë dhe sende me vlerë, por deri më tani nuk është marrë asnjë masë.
Ndërkohë duhet të theksojmë faktin se ky problem, pra kërkesa e policisë i është dërguar TIA-s që në korrik të vitit 2018 dhe deri më tani nuk është marrë asnjë masë e vetme për rregullimin e situatës.
