Gjatë emisionit të mëngjesit “Koha për t’u zgjuar”, avokati Erald Aga foli për sfidat që hasin pronarët në regjistrimin e pronave dhe sqaroi format e fitimit të titujve të pronësisë.
Sipas tij, titujt e pronësisë mund të fitohen përmes kontratës së shitjes, dhurimit, ligjit të tokave bujqësore (AMTP), ligjit të posaçëm dhe trashëgimisë.
Avokati u ndal veçanërisht te problemet që hasin pronarët me tituj të pronësisë nga AMTP, duke theksuar se ata e kanë të vështirë të regjistrojnë pronën në kadastër për shkak të pengesave administrative dhe ligjore.
Në rastet kur prona me AMTP është zaptuar dhe mbi të është ndërtuar, Aga shpjegoi se procesi kërkon ndërhyrjen e shtetit:
“Duhet të rregullohet marrëdhënia mes shtetit dhe zaptuesit. Pas kësaj, nxirret një Vendim i Këshillit të Ministrave (VKM) që përcakton të drejtën për regjistrim”, sqaroi ai.
Mbi blerjen e pronave pa hipotekë, avokati theksoi se hipoteka është vetëm një akt deklarativ dhe nuk përcakton pronësinë. Ai shtoi se edhe nëse ke të gjitha dokumentet dhe hipoteka nuk pranohet nga punonjësi i kadastrës, kjo nuk të bën më pak pronar.
“Nëse prona është bllokuar nga një bankë, duhet të lidhësh një marrëveshje me bankën dhe vetëm më pas mund të vazhdosh regjistrimin,” përfundoi avokati.
