Teksa kullat po shtohen gjithnjë e më shumë në Tiranë, deputetja e Partisë Demokratikë, Flutura Açka ka ironizuar qëndrimin e qeverisë. Açka ka shkruajtur me anë të një statusi në ”Facebook” se sado gjethe të vendosin nuk mbulohet dot betoni që ka ‘pushtuar’ Tiranën.
Gjithashtu deputetja ka paralajmëruar qeverinë që t’i numërojë mirë katet që po ndërtohen tani që mos të dalin probleme më vonë.
Reagimi i plotë i Açkës:
I vini gjethe sa të doni, beton është, që Tirana e ka tepër me tepri.
Ndonjë kompleks fushash sporti, ndonjë parkim publik shumëkatësh, ndonjë qendër autobusi të afër qytetës, ndonjë linjë të lirë tramvaji nëpër kryeqytet, ndonjë park lodrash për fëmijë jashtë parkut, ndonjë muze fëmijësh, ndonjë muze xhubletash, ndonjë librari kombëtare… ose Teatrin Kombëtar Klasik, jo atë me xhama farfuritëse, keni?
Gjurma juaj mbi Tiranë i shkon vetëm një sekti falik, i ngjashëm me fashizmin, por këtë herë fashizmi i betonarmesë.
Ëndrrat projektuese, që këto të ashtuquajtura studio europiane projektimi, nuk mund t’i realizojnë në vendet e tyre, se nuk të le kush t’ua marrësh ajrin dhe dritën qyteteve e qytetarëve aq lehtë, i zbatojnë lehtësisht këtu, mes të korruptuarve tanë.
Vetëm kujdes, i numëroni katet mirë tani, të mos ju dalin tepër më vonë? Vërtet ju do të mbretëroni aq vonë?!
Ç’bën Opozita, bashkë me mua? Mban shënim.
