Prej disa ditësh, kryeqyteti është mbytur nga plehrat, me kazanët e mbeturinave që qëndrojnë të stërmbushur dhe askush nga institucionet përkatëse nuk kujdeset për t’i hequr. “Reforma” e ka denoncuar vazhdimisht këtë emergjencë, por për momentin asnjë nuk ka ndryshuar. Kjo situatë gjendet në çdo lagje të kryeqytetit, ndërkohë që Bashkia Tiranë, me në krye Erion Veliaj justifikohet me faktin se operatorit privat për pastrimin e kazanëve i ka mbaruar kontrata për disa zona. Veliaj premtoi se pastrimin e qytetit do ta marr përsipër “Eco Tirana”, të paktën në disa lagje, por përmirësime nuk po duken askund. Të shumtë janë qytetarët që e kanë ngritur një problematikë të tillë, ndërkohë që së fundmi ka qenë edhe nënkryetarja e Partisë së Lirisë, Erisa Xhixho, e cila ka publikuar një video në rrjetet sociale ku tregohen kazanët e mbeturinave të tejmbushura në disa rrugë të Tiranës.
Xhixho shprehet se Tirana ndodhet në emergjencë mjedisore, dhe se një grup i strukturuar kriminal drejton sot bashkinë e Tiranës.
Postimi i Xhixhos:
Nga grupi i strukturuar kriminal që sot drejton Bashkinë e Tiranës, shëndeti i qytetarëve nuk mund të jetë prioritet, pasi paratë tona po shkojnë për 5D dhe inceneratorin fantazmë. Ndërkohë, Tirana ndodhet në emergjencë mjedisore.
