Për më shumë se një muaj karantinimi nga frika e Covid-19, shqiptarët tashmë kanë dalë nga shtëpitë e tyre për të filluar rutinën.
Disa pamje nga Tirana janë publikuar në rrjet, ku shihet se rrugët e kryeqytetit janë plot me njerëz.
Mesa duket Tirana i është kthyer normalitetit, me lehtësimin e masave parandaluese nga kryeministri Rama.
Njerëz të moshave të ndryshme nuk kanë nguruar të dalin në rrugë me ose pa maskë.
Nga pamjet vihet re se shumica prej tyre nuk preferojnë të mbajnë maska dhe doreza.
Pronarët e lokaleve kanë nisur përgatitjen për hapjen e aktiviteteve të tyre që është parashikuar të ndodhë në datën 18 maj. Pa harruar këtu që sektori i restoranteve e bareve është ndër më të prekurit nga kriza ekonomike, si pasojë e situatës së shkaktuar nga Covid-19.
Më herët, Shoqata e Bareve dhe Restoranteve i ka dërguar një letër kryeministrit Edi Rama dhe ministres së Shëndetësisë, Ogerta Manastirliu, ku i kanë kërkuar ndërmarrjen e një iniciative të veçantë ligjore për lehtësimin financiar në këtë periudhë të vështirë.
Në këtë shoqatë janë pjesë 100 subjekte, të cilat në këto kushte që janë momentalisht, 50% deri në 70% të subjekteve nuk do të mund të rihapen dot. Madje ato që do të ushtrojnë aktivitetin nga 18 maji, do të duan 18 muaj që situata të shkojë në normalitet.
Pronarët e bizneseve të këtij sektori kanë ngritur shqetësimet e tyre edhe në lidhje me kuzimet e orarit. Pas hapjes së tyre ata do të qëndrojnë të hapur deri në orën 17:30. Për këtë arsye, pronarët i kanë kërkuar kryeministrit Rama që të shtyjë orarin deri në orën 1:00 pas mesnate.
