Ditën e sotme aktivistja Evi Kokalari akuzon deputetin e Partisë Demokratike Belind Këlliçi se po fshihet pas sulmeve që i janë bërë asaj në rrjetet sociale. Në një postim, Kokalari shkruan se po sulmohet në rrjet fill pas përplasjes që ka pasur me Këlliçin. Ajo e akuzoi Këlliçin se ka manipuluar votat brenda zgjedhjeve në PD për të dalë vetë më i votuari.
“Si nuk del njoni ta rraf mirë dhe t’ia jap flokët në dorë”, m’u kujtua episodi i Musine Kokalarit, e cila kur doli nga një prej seancave të gjyqit, pjellat komuniste i shkulën flokët. Faji i saj i vetëm ishte se kërkoi një sistem politik dhe zgjedhje të ndershme në të mirë të vendit të saj. Pak, shumë pak kanë ndryshuar njerëzit këto 80 vitet e fundit. Ka akoma monstra që dhunën, sharjet dhe shpifjet i kanë rendin e ditës, dhe sa nga ju ‘intelektuale’ keni ngritur zërin ndaj këtij lloj sulmi që keni parë këto 5 javë kundër meje? Sa nga ju gazetarë që flisni “realitetin” keni thënë “boll” me këtë absurditet. As nuk dua t’i hyj faktit që ata që predispozoheshin miqtë e mi më të ngushtë në Tiranë, i kanë dhënë platforme totalisht monstrave si Belind Këllira, që siç ma kanë pranuar dhe ata vetë – është mbas të gjitha këtyre sulmeve nga dy portalet plehra. Sa nga gratë gazetare kanë reaguar për këtë lloj vullgariteti drejtuar nga katër-pesë meshkuj? E po ta marrim hollë-hollë, cili qe faji im këtu? Që denoncova manipulim votash dhe listash në zgjedhjet e Këshillit dhe të Kryesisë? E sa nga ju mendoni se e meritoj këtë lloj sjelljeje? Sa nga ju anëtarë të PD ngritët zërin kundër sulmeve absurde të CNA & Nova medias? Po nga ju të shoqërisë civile që na çanit veshët ditë e natë duke bërtitur kundër padrejtësive, sa herë e ngritët zërin? ZERO!!! Hipokrizia juaj duket qartë. Indiferenca juaj është e turpshme. Karakteri juaj–mediokër,”- shkruan Kokalari.
Si nisi përplasja mes tyre?
Kujtojmë se Kokalari nisi një valë denoncimesh kundrejt Këlliçit për të cilin shkruante se ka manipuluar votat brenda zgjedhjeve në PD. Sipas saj, Këlliçi ka lobuar dhe orientuar votuesit për kandidatët që janë zgjedhur. Kjo ndodhi kur PD-ja finalizoi zgjedhjen e organeve drejtuese. Pas akuzave, Këlliçi paralajmëroi një përballje në gjykatë me Kokalarin.
