Në seancën e sotme në Kuvend, debati mes deputetit Agron Shehaj dhe ministrit të Drejtësisë, Ulsi Manja, u përshkallëzua në lidhje me çështjen e Amnistisë Penale. Shehaj akuzoi Manjan se ka gënjyer në lidhje me përfituesit e amnistisë, duke thënë se asnjë i dënuar për korrupsion nga Gjykata e Posaçme nuk do të përfitonte nga amnistia.
“Ministri i Drejtësisë deklaroi që nuk do të ketë as amnisti, as ulje të dënimit për të dënuarit për korrupsion,” citon Shehaj fjalët e Manjës në parlament. “Ministri gënjeu me paturpësinë më të madhe,” shtoi ai.
Shehaj vazhdoi duke thënë se, në fakt, amnistia ka çliruar rreth 40 zyrtarë nga burgu dhe ka ulur dënimet për 60 të tjerë. Ai i bëri thirrje ministrit të japë dorëheqjen dhe e akuzoi se qeveria po dërgon mesazhe të qarta kundër përpjekjeve të SPAK-ut për të luftuar korrupsionin: “Ju i kapni, ne i lirojmë,” u shpreh Shehaj.
Debati u intensifikua kur Shehaj i bërtiti Manjës nga foltorja të japë dorëheqjen, ndërsa Manja, pa përdorur mikrofonin, iu përgjigj me tone të ashpra, duke e akuzuar Shehajn për sjellje të dyshimta dhe duke i thënë se do vijë koha kur do të dalin në dritë të vërtetat e tij.
“Dhe tani që amnistia mori 116 vota, vjen këtu dhe na del si kalorësi i ndershmërisë,” tha Manja, duke iu drejtuar Shehajt. “Mbaje mend, nuk do të jetë e largët dita që ajo fytyra jote prej ëngjëlli të dalë ashtu siç është në të vërtetë.”
