Një libër i publikuar nga reporterët e Washington Post ka nxjerrë në dritë detaje të reja për mënyrën si ish-presidenti Donald Trump kishte menduar ta përballonte pandeminë e koronavirusit. Në libër thuhet se Trump kishte marrë në konsideratë që shtetasit amerikanë të infektuar të dërgoheshin në Guantanamo.
“A nuk kemi një ishull që zotërojmë? Po në lidhje me Guantanamo?”, ka pyetur Trump stafin në Sallën e Monitorimit të Situatës në shkurt të vitit të kaluar, raporton Washington Post.
Gjiri Guantanamo është një kamp paraburgimi në Kubë që SHBA përdor për të strehuar ata që akuzohen për krime të rënda, duke përfshirë luftëtarë armiq nga luftërat e huaja dhe ata që dyshohet se qëndrojnë pas sulmeve të 11 Shtatorit.
“Ne importojmë mallra. Nuk do të importojmë një virus”, thuhet në libër duke cituar fjalën e Trump.
Komentet erdhën përpara se rastet e koronavirusit të dilnin jashtë kontrollit në SHBA. Administrata e Trump u përball me kritika të vazhdueshme për mënyrën si e menaxhoi pandeminë , e cila ka vrarë më shumë se 601,000 njerëz në vend, sipas vlerësimeve të Universitetit Johns Hopkins. Shumica e atyre vdekjeve, afërsisht 400,000, ndodhën nën administrimin e Trump.
Ndihmësit e Trump u habitën nga pyetja në lidhje me Gjirin Guantanamo dhe e mbyllën idenë herën e dytë që u ngrit, raporton Washington Post.
Libri, i titulluar Skenari i Makthit: Brenda përgjigjes së administratës Trump ndaj Pandemisë që ndryshoi historinë, u shkrua nga gazetarët Yasmeen Abutaleb dhe Damian Paletta. Përmbajtja e librit erdhi nga intervistat me ish-këshilltarët e lartë të Trump dhe zyrtarë shëndetësorë, duke rrëfyer biseda të shumta që përshkruajnë reagimin e administratës Trump ndaj pandemisë.
