Ditën e djeshme 300 forca policore në bashkëpunim me RENEA-n, finalizuan operacionin për arrestimin e Klement dhe Eldi Çalës.
Ata ishin fshehur në një vilë në Qerret të Kavajës.
Pasi rrethuan vilën forcat e policisë u futën brenda dhe i vunë prangat dy të shumëkërkuarve për grabitjen e miliona eurove në Rinas.
Në pamjet e arrestimit, shihet se sa shumë kishin ndryshuar dy vëllezërit, në krahasim me fotot që kishte publikuar policia, ndërsa i kishte shpallur në kërkim.
Gjatë operacionit, policia sekuestroi 3 makina luksoze “Audi”, motorë dhe një shumë të konsiderueshme parash.
Kujtojmë këtu se mesditën e 9 prillit, 4 persona të maskuar dhe të armatosur, u futën brenda rrethimit të aeroportit të Rinasit me një furgon me mbishkrimin “Hetimit Tatimor”.
Ata arritën të grabisnin 4.6 milion euro nga barku i avionit “Austrian Airlines”, para këto që i përkisnin bankave të nivelit të dytë në Shqipëri.
Pak km në dalje të Rinasit, autorët u përleshën me policinë, ku si pasojë e të shtënave humbi jetën Admir Murataj, i konsideruar si truri i grabitjes.
