Një 56-vjeçar nga fshati Topojan i Kukësit ka ndërruar jetë nga koronavirusi. Ai ishte i shtruar në spitalin Infektiv, ndonëse nuk dihet nëse ka vuajtur nga sëmundjet bashkëshoqëruese, raporton Dosja.al.
Viktima e radhës nga pandemia në Shqipëri dhe rastet e reja të të prekurve priten të konfirmohen në përditësimin e përditshëm nga ana e Ministrisë së Shëndetësisë.
Kujtojmë se në 24 orët e fundit janë regjistruar 3 viktima nga koronavirusi i ri në Shqipëri, duke e çuar në total numrin e atyre që kanë vdekur nga virusi në 104. Viktima e parë është një 44-vjeçare nga Tirana, e cila ishte e intubuar (frymëmarrje të drejtuar për 10 ditë) dhe vuante nga disa sëmundje, përveç obezitetit. Viktimat e tjera janë edhe një 64 vjeçar nga Tirana dhe një 65 vjeçare nga Vlora me sëmundje bashkëshoqëruese.Ndërkohë, një numër shumë i lartë i rasteve të reja, vazhdon të jetë shqetësues për autoritetet, pasi 99 persona janë konfirmuar pozitivë me Covid-19 në 24 orët e fundit.
Deri më tani Shqipëria ka regjistruar gjithsej 3,851 raste COVID-19, përfshirë 104 vdekje që prej fillimit të shpërthimit, ndërsa 1.610 prej tyre janë aktivë.
