Një vrasës me pagesë, i maskuar si shpërndarës picash dhe i lëvizur me motor, hyri qetësisht në një bar buzë detit në Shëngjin dhe ekzekutoi biznesmenin Ardian Nikulaj, duke e qëlluar shtatë herë me armë zjarri. Pamjet e kamerave të sigurisë tregojnë momentin e atentatit brutal, që ndodhi në mes të ditës, përpara klientëve dhe stafit.
Sipas gazetës britanike The Sun, vrasja e Nikulajt është pjesë e një hasmërie 30-vjeçare mes dy familjeve nga veriu i Shqipërisë, një konflikt që deri më tani ka marrë tetë jetë. Ajo që e bën këtë rast të pazakontë është fakti se, për herë të parë, për ekzekutimin u rekrutua një skuadër e huaj vrasësish nga Britania.
Ndërsa autoritetet shqiptare paralajmërojnë rrezik për gjakderdhje të mëtejshme, beteja për drejtësi është zhvendosur edhe në gjykatat britanike. Personat e dyshuar për vrasjen e Ardian Nikulajt po kundërshtojnë ekstradimin drejt Shqipërisë, ku pritet të gjykohen për rolin e tyre në atentat.
Gazetarët e “The Sun” udhëtuan në Shqipëri për të rindjekur hapat e skuadrës së dyshuar të atentatorëve në ditët dhe orët para vrasjes. Ndërkohë, familja e Nikulajt ka hapur dosjen e provave, duke pretenduar se ajo tregon qartë se kush qëndron pas atentatit. Ata shprehin frikën se zinxhiri i vrasjeve nuk ka përfunduar ende, pasi vëllai i Ardianit është paralajmëruar se ekziston një shpërblim prej 1.7 milionë paundësh për kokën e tij.
E veja e Ardian Nikulajt, Rudina, 49 vjeçe, mes lotësh u shpreh për “The Sun”:
“Vrasjet duhet të ndalen. Ka pasur mjaft. Ne kërkojmë drejtësi për Ardianin dhe i lutemi Britanisë së Madhe të bëjë gjënë e duhur dhe t’i dërgojë këta persona këtu për t’u përballur me drejtësinë. Shumë fëmijë kanë mbetur pa baba”.
Hasmëria nisi në vitin 1997, kur vëllai i Ardianit, Pëllumb Nikulaj, që punonte si roje sigurie në një pikë karburanti, u përplas me familjen Lekstakaj pas një incidenti për pagesën e karburantit. Disa orë më vonë, një grup i armatosur mbërriti në pikën e karburantit dhe vrau Pëllumb Nikulajn dhe pronarin e biznesit. Në dy vitet që pasuan, u regjistruan edhe tre vrasje të tjera, derisa konflikti mbeti i heshtur për 24 vjet.
Hasmëria shpërtheu sërish në prill të vitit 2023. Më 19 prill, rreth orës 13:23, Ardian Nikulaj, 51 vjeç, ndodhej i ulur në barin buzë detit që zotëronte, pranë hotelit Coral, të cilin e drejtonte me vëllain e tij Arbenin. Pak sekonda pasi mori një telefonatë, ai pa një person të maskuar, të veshur si korrier, që iu afrua tavolinës dhe nxori armën.
Vrasësi e qëlloi shtatë herë nga afër dhe u largua me motorin që e kishte lënë të ndezur. Sipas policisë, ai u drejtua drejt jugut, kaloi kufirin grek dhe më pas u arratis në Marok.
Autoritetet besojnë se ekzekutori ishte Ruben Saraiva, shtetas portugez që kishte jetuar prej vitesh në Britani. Ai u lokalizua dhe u ekstradua nga Maroku dhe aktualisht ndodhet në Shqipëri, ku pritet të përballet me drejtësinë. Një tjetër i dyshuar është britaniku Harry Simpson, 34 vjeç, i dënuar më parë për trafik droge. Si organizator i atentatit dyshohet Edmond Haxhia, 40 vjeç, britaniko-shqiptar nga Birminghami, i afërm i familjes rivale në hasmëri.
Pamjet e kamerave tregojnë gjithashtu Harriet Bridgeman dhe Steven Hunt duke u regjistruar në hotelin e Nikulajt. Ata dyshohet se kanë marrë pjesë në vëzhgimin dhe planifikimin e atentatit.
Bashkëshortja e Ardianit ndodhej në apartamentin e tyre mbi bar në momentin e vrasjes dhe mori vesh për ngjarjen nga stafi. “Ishte tmerr. Të gjithë bërtisnin”, kujton ajo.
Hetimet zbuluan se disa nga të dyshuarit kishin qëndruar për ditë të tëra në hotel, duke filmuar ambientet dhe duke u përpjekur të afrohen me viktimën. Një ekspert shqiptar i krimit të organizuar tha se përpjekjet për eliminimin e Nikulajt kishin nisur që në vitin 2021, por askush në Shqipëri nuk kishte pranuar kontratën prej 1.7 milionë paundësh, ndaj atentatorët u kërkuan jashtë vendit.
Pas atentatit, policia gjeti motorin e përdorur për arratisje të hedhur në një lumë. Hetimet çuan në lidhjen e tij me Edmond Haxhian dhe bashkëpunëtorët e dyshuar. Nëse ekstradimi miratohet, në Shqipëri pritet të gjykohen edhe Haxhia, Simpson, Steven Hunt, Thomas Mithan dhe Harriet Bridgeman, e cila aktualisht fshihet në një adresë sekrete.
Në Shëngjin, vëllai i Ardianit, Arben Nikulaj, thotë se jeton çdo ditë me frikë.
“Çdo natë i puth fëmijët pa e ditur nëse do t’i shoh përsëri në mëngjes”, u shpreh ai. Ndërsa në Coral Bar, tavolina ku u vra Ardiani mban një tabelë “e rezervuar” përgjithmonë, në kujtim të biznesmenit të vrarë.
