Kreu i shtetit të Kosovës Hashim Thaçi, i kërkoi Bashkimit Europian të vendosë në tryezën e bisedimeve Prishtinë Beograd njohjen reciproke, që sipas presidentit duhet të jetë dhe pika kryesore e marrëveshjes përfundimtare midis dy vendeve.
Deklaratat e Thaçit u bënë gjatë një konference shtypi, pas takimit me përfaqësuesin e Bashkimit Europian për Dialogun Miroslav Laçak. Ky i fundit qëndron në Prishtinë për ditën e dytë , në kuadër të vijimit të dialogut midis palëve.
“Ka ardhur momenti që Bashkimi Evropian, nga ajo që shoh është edhe aktualisht unik në mbështetje të zotit Lajçak, të hidhet në tavolinë mundësia e diskutimit për njohje reciproke dhe duhet të jetë pika e parë e marrëveshjes” nënvizoi presidenti i Kosovës duke shtuar se nëse arrihet një marrëveshje e tillë në Bruksel ajo do të kontribuonte në qendrueshmërinë dhe fqinjësinë e mirë në rajon. Kreu i shtetit të Kosovës theksoi se për këtë është i nevojshëm angazhimi i partnerëve ndërkombëtarë.
“Edhe në takimin që kam zhvilluar ditë më parë me Lajçak në Bruksel ka qenë po tema të njëjta të diskutimit edhe gjithashtu në Washington në takimet që kam zhvilluar me autoritetet e larta të SHBA-së, në takime joformale, e gjithashtu edhe në Paris pardje, shoh një koordinim më të mirë dhe nivel më të lartë edhe të Bashkimit Evropian, të kryeqendrave pra edhe me Shtetet e Bashkuara të Amerikës dhe ky është një mesazh i qartë, i mirë dhe mendoj inkurajues edhe për ne në Kosovë që të jemi sa më unik, sa më të bashkuar në këtë proces të dialogut përballë Serbisë, në mënyrë që të finalizohet ky proces sa më shpejt, sa më mirë, me njohjen reciproke të Kosovës me Serbinë” vuri në dukje Thaçi.
Vijimi i procesit të dialogut duket se është bllokuar për shkak të çështjes së Asociacionit të komunave me shumicë serbe në Kosovë. Serbia nga ana e saj kërkon implementimin e marrëveshjes të arritur në vitin 2013 në Bruksel. Ndërkohë Kosova e konsideron atë një çështje të mbyllur, pasi gjykata e vendit vendosi të rrëzojë marrëveshjen në fjalë duke argumentuar se pikat e saj nuk janë në përputhshmëri me kushtetutën e vendit.
\Gazetareforma.al\
