Kryebashkiaku i Bulqizës, Lefter Alla ka deklaruar, se do të padisë ish-deputetin demokrat Ervin Salianji, pas akuzave për videon ku shfaqet duke pirë kokainë.
I menjëhershëm ka qenë reagimi i Salianjit, i cili largoi përgjegjësinë nga vetja, duke thënë se PD i është referuar medias dhe nuk ka bërë asnjë verifikim vetë.
Në një prononcim për “Report Tv”, ish-deputeti u shpreh, se në video kryebashkiaku duket qartë si fshesë me korent, duke thithur kokainën.
“Sasia e kokainës që ishte aty dhe njerëzit aty ka shkelje të ligjit. Në lokal nuk lejohet duhani dhe jo më substanca të tjera, që duhet të dalë nga hetimi se cfarë ishin. Nga ana ligjore janë këto elementë, ndërsa nga ana morale mund ta gjykojnë të gjithë vetë. Unë kam mbrojtur dhe do të mbroj interesin publik dhe do të denoncoj me emër, ky është një investigim gazetaresk, që i jam referuar. Qeveria duhet ta shkarkojë menjëherë, pasi në një tjetër rast ish-kryebashkiaku i Dibrës u shkarkua menjëherë për një vepër pak më të rëndë apo të ulët. Ky është një njeri me rrezikshmëri të lartë. Ky është kryebashkiaku i gjashtë i kapur me afera” tha ai.
Më tej Salianji u pyet, se si do të veprojë, nëse denoncimi nuk rezulton i vërtetë.
Ai u shpreh se PD do të mbajë përgjejësi, ashtu si për akuzat e tjera kundër ish-kryebashkiakut të Kavajës, Elvis Roshi, Habilajve, apo grupeve të tjera.
“Sikur kemi mbajtur përgjegjësi për akuzat e tjera, kundër Rroshit, Pjerit, Habilajt apo grupeve të tjera. Kemi 7 vite që denoncojmë me emër dhe janë të faktuara. Për rastin konkret ka qenë investigim gazetaresk. PD-ja i është referuar medias. Dje kam parë fotot dhe shkrimet në media dhe nuk kemi pasur asnjë dijeni tjetër. Nëse do ta kishim do të bënim verifikimet tona, por është rast gazetaresk i pavarur. Ai duket qartë si fshesë me korrent duke thithur kokainën. Për të gjitha denoncimet që kanë ardhur nga PD-ja i faktuar me prova, ka edhe të tjerë që janë përfshirë në aktivitete kriminale”, përfundon Salianji.
