Emisioni “Stop” në Tv Klan ka trajtuar një rast të rëndë dhune në Sarandë, ku një e mitur 13-vjeçare u dhunua nga tezja e saj pas një konflikti pronësie.
Për shkak të moshës së vogël të vajzës dhe pasigurisë për bullizmin që mund të pësonte, në vend të saj ka folur mamaja e saj, duke treguar për konfliktin mes saj dhe motrës.
Sipas hetimeve të para, tezja është shoqëruar për agresionin ndaj mbesës, por më vonë ka kallëzuar se është dhunuar nga motra dhe mbesa.
Ndërkohë, ngjarja ka marrë një kthesë të papritur kur dosja e hetimit ka kaluar në prokurori dhe janë shfaqur mangësi në dokumentacionin mjekësor.
Mjeku ligjor Arianit Taka shpjegoi se ekspertët janë ata që bëjnë vlerësimin objektiv të dëmtimeve dhe nuk është gjithmonë e nevojshme të dokumentohen me foto, por një akt i tillë duhet të ketë mbështetje nga dokumentacioni.
Ish-drejtori i Policisë Shkencore, Vladimir Ikonomi, theksoi se çdo akt ekspertimi duhet të shoqërohet me foto për të pasur prova të mjaftueshme.
Kjo çështje ka nxjerrë edhe kritika ndaj institucioneve, pasi mungesa e dokumentacionit të plotë mund të ndikojë në saktësinë e hetimeve dhe të drejtën e vajzës për drejtësi.
