Një tërmet me magnitudë 5.8 të shkallës Rihter goditi në orët e para të mëngjesit zonën detare midis ishullit grek të Rodosit dhe bregdetit turk, duke shkaktuar panik tek banorët dhe turistët.
Lëkundjet u regjistruan në orën 02:17 pas mesnate, me epiqendër në detin Egje, dhe janë ndjerë fort në disa qytete të Turqisë, përfshirë Muğla, Izmir, Antalia, Aydın, Denizli dhe Manisa.
Në Greqi nuk ka raportime për të lënduar, por në Turqi situata është më e rëndë.
Një vajzë 14-vjeçare humbi jetën pas një sulmi paniku gjatë tërmetit në qytetin bregdetar Fethiye. Sipas autoriteteve, ajo u dërgua me urgjencë në spital, por nuk arriti t’i mbijetonte gjendjes së rënduar.
Ministri i Brendshëm turk, Ali Yerlikaya, tha se gjithsej 69 persona janë plagosur, shumica prej tyre pasi u hodhën nga ballkonet apo dritaret nga frika.
“U uroj shërim të shpejtë qytetarëve tanë dhe lus Zotin të na ruajë nga fatkeqësitë”, deklaroi ai.
Autoritetet vijojnë monitorimin e situatës, ndërsa qytetarët janë këshilluar të tregojnë kujdes për shkak të mundësisë së pasgoditjeve.
