Një tërmet me magnitudë 6.1 ballë goditi zonën e Sındırgı në Balıkesir, duke u ndjerë fort në disa provinca të rajoneve të Marmarasë dhe Egjeut, përfshirë Stambollin, Izmirin, Bursën, Tekirdağun, Kocaelin dhe Sakaryan.
Sipas Autoritetit për Menaxhimin e Fatkeqësive dhe Emergjencave (AFAD), tërmeti është regjistruar në një thellësi prej 5.99 kilometrash.
Ministri i Brendshëm, Ali Yerlikaya, konfirmoi se fatmirësisht nuk janë raportuar viktima. Ai bëri të ditur se tre ndërtesa të papërdorura dhe një dyqan janë shembur, ndërsa dy persona kanë kërkuar ndihmë mjekësore për lëndime të lehta. Në disa pjesë të Sındırgı janë konstatuar dëmtime të pjesshme në godina.
Si masë paraprake, autoritetet kanë vendosur mbylljen e përkohshme të shkollave në Balıkesir. Ekipet e AFAD-it dhe institucionet lokale kanë nisur menjëherë kërkimet dhe vlerësimet e situatës në terren.
Guvernatori i Balıkesir, İsmail Ustaoğlu, deklaroi se të gjitha ekipet ndihmëse janë në gatishmëri dhe po punojnë për të garantuar sigurinë dhe mbështetjen e qytetarëve të prekur.
Ndërkohë, Guvernatori i Qarkut Sındırgı, Doğukan Koyuncu, tha se nuk ka raportime për viktima në zonat rurale, por inspektimet po vazhdojnë.
Sipas njoftimeve zyrtare, tre ndërtesat e shembura përfshijnë dy godina katërkatëshe në Rrugën Akhisar, të cilat ishin evakuuar dhe vulosur më herët për shkak të dëmtimeve nga tërmeti i 10 gushtit, si dhe një ndërtesë dykatëshe në Sheshin Cumhuriyet, ku ndodheshin tre dyqane në katin përdhes.
