Të paktën 53 persona kanë humbur jetën dhe 62 të tjerë janë plagosur pas një tërmeti të fuqishëm me magnitudë 7.1 ballë që goditi rajonin malor të Tibetit të martën në mëngjes, raportojnë mediat shtetërore kineze.
Tërmeti ndodhi rreth orës 09:00 me kohën lokale (01:00 GMT) në qytetin e shenjtë Shigatse, në një thellësi prej 10 kilometrash, sipas të dhënave nga Shërbimi Gjeologjik i SHBA-së. Raportet tregojnë se pasgoditjet vazhdojnë të tronditin zonën.
Epiqendra e tërmetit ndodhej në pikën ku përplasen pllakat tektonike indiane dhe euroaziatike, një rajon i njohur për aktivitet të lartë sizmik. Kjo zonë malore, që ndodhet pranë Himalajeve, ka potencial për të shkaktuar ndryshime në lartësinë e disa prej majave më të larta të botës.
Lartësia mesatare e rajoneve përreth epiqendrës është rreth 4200 metra mbi nivelin e detit, dhe në këtë zonë të largët ndodhen disa komunitete të vogla, për të cilat ende nuk ka të dhëna të plota mbi dëmet dhe shkatërrimet.
Tërmeti u ndje deri në kryeqytetin e Nepalit, Katmandu, ku disa banorë u zgjuan nga lëkundjet, megjithëse nuk pati raportime për dëme apo viktima. Situata në rajonet malore përtej kufirit nepalez pranë epiqendrës mbetet ende e paqartë për shkak të aksesit të vështirë në ato zona.
Sipas Shërbimit Gjeologjik të SHBA-së, kjo zonë ka përjetuar më shumë se 10 tërmete me magnitudë mbi 6 ballë gjatë shekullit të fundit. Aktiviteti i shpeshtë sizmik në këtë rajon është pasojë e përplasjes së pllakave tektonike që vazhdon të formësojë peizazhin e Himalajeve.
Autoritetet lokale dhe ekipet e emergjencës janë në terren për të ofruar ndihmë dhe për të vlerësuar dëmet e shkaktuara.
Situata mbetet ende kritike dhe zhvillimet po monitorohen nga afër.
