Mësohet se Partia Demokratike do të mbledhë në orën 19:00, Grupin Parlamentar në selinë blu.
Mësohet se në fokus të mbledhjes së Grupit Demokrat do të jetë seanca plenare që do të mbahet nesër. Kujtojmë se në seancën e nesërme parlamentare pritet që të miratohet qeveria e re dhe programi qeverisës “Rama 3”. Ndërsa vetë Partia Demokratike ka publikuar një njoftim të shkurtër në faqen e saj zyrtare.
“Sot, në orën 19:00 në seli do të zhvillojmë mbledhje grupi lidhur me seancën nesër, seancë me tepër rëndësi”, thuhet në njoftimin nga selia blu.
Kujtojmë se disa ditë më parë kreu i Partisë Demokratike, Lulzim Basha përjashtoi nga grupi parlamentar i PD-së, ish-kryeministrin Sali Berisha, pas shpalljes non grata të këtij të fundit nga DASH. Berisha nga ana tjetër ka deklaruar se vendimi i Bashës është nul dhe se ai është pjesë e grupit parlamentar të PD-së. Madje në seancën plenare ai braktisi sallën e Kuvendit së bashku me grupin opozitar të PD-së. Po ashtu ditën e djeshme Presidenti Ilir Meta pasi mori një përgjigje nga Prokuroria e Përgjithshme ka dekretuar pa asnjë kundërshtim ministrat e rinj të kabinetit qeveritar “Rama 3”. Tani i takon Kuvendit në seancën e radhës të vendosi për fatin e ministrave të rinj.
