Shkëlqim Kastrati, i riu nga kosova që ishte shpallur në kërkim është ekstraduar ditën e sotme drejt Gjermanisë. Prej 5 vitesh ai ishte shpallur në kërkim pasi mbi të rëndon akuza për tentativë vrasjeje të një rojeje në një klub nate. Kastrati njihet ndryshe dhe me emrin si “Kimi”.
Gjykata e lartë ishte ajo që mori vendimin për ekstradimin e Kastratit në Gjermani duke dhënë urdhrin që sapo ky i fundit të ketë përfunduar dënimin e marrë në Shqipëri, për akuzën e “Mbajtjes pa lejë të armëve dhe municioneve” dhe “Prodhimit e shitjes së lëndëve narkotike”, të transportohet drejt vendit të BE.
I riu nga Kosova e ka qëlluar me pistoletë rojen e një klubi nate pas një konflikti. Punonjësi i sigurisë i mbijetoi sulmit falë jelekut antiplumb që mbante veshur në trup. Pasi kreu krimin, Kastrati u largua menjëherë nga Gjermania dhe u strehua në Shqipëri. Autoritet e drejtësisë nxorën mandat arresti për Kastratin, por nuk mundën ta lokalizonin dhe arrestonin brenda territorit gjerman.
Në muajin maj të viti 2019 Shkëlqim Kastrati u arrestua nga policia në Shqipëri në ambinetet e një palestre. Gjatë kontrollit në banesën e tij policia gjeti dhe sekuestroi një armë zjarri, plumba dhe një sasi kanabis.
