Një 26-vjeçar , i cili tentoi të kalonte kufirin në Kapshticë duke korruptuar policin doganor është proceduar penalisht. Ai akuzohet për korrupsion aktiv të personave që ushtrojnë funksione publike.
Njoftimi i policisë
Kapshticë/Vijojnë kontrollet e detajuara për goditjen e paligjshmërisë.
Tentoi të korruptonte punonjësin e Policisë Kufitare, që të kalonte kufirin, në mënyrë të parregullt, procedohet penalisht 26-vjeçari.
Punonjësit e Policisë Kufitare në Pikën e Kalimit Kufitar Kapshticë, gjatë kryerjes së procedurave të regjistrimit të shtetasve që kalojnë kufirin, kanë goditur një rast të korrupsionit aktiv të personave që ushtrojnë funksione publike.
Shtetasi K. S., 26 vjeç, banues në Belsh, Elbasan, gjatë kryerjes së procedurave të regjistrimit në dalje të Republikës së Shqipërisë, në momentin kur punonjësi i Policisë i ka kërkuar pasaportën, ai ia ka dhënë atë, me një kartëmonedhë të prerjes 20 euro në brendësi të saj, me qëllim shmangien e procedurave të kontrollit të dokumentacionit, duke qenë se nuk dispononte dokumentet e nevojshme për të udhëtuar në drejtim të Greqisë.
Në vijim të veprimeve procedurale, specialistët për Hetimin e Krimit Ekonomiko-Financiar në Drejtorinë Vendore të Policisë Korçë referuan materialet në Prokurori ku filloi procedimi në gjendje të lirë për shtetasin K. S.
Materialet i kaluan Prokurorisë pranë Gjykatës së Shkallës së Parë Korçë, për veprime të mëtejshme.
