Prokuroria pranë Gjykatës së Shkallës së Parë Shkodër ka përfunduar hetimet dhe ka dërguar në gjyq shtetasin Ermir Hebovija për veprën penale “Vjedhja me armë”, të mbetur në tentativë, kryer në bashkëpunim.
35-vjeçari dyshohet për tentativën e vjedhjes me armë zjarri të një argjendarie në Shkodër më 13 nëntor 2012.
Hebovija u arrestua në maj të vitit të kaluar në Spanjë, si rezultat i operacionit të përbashkët me autoritetet spanjolle, të koduar “Capital”.
Megjithatë, edhe pas afro 9 muajsh nga arrestimi i tij, ai ende nuk është ekstraduar në Shqipëri për shkak të familjes që ka në Francë. Autoritetet shqiptare dhe ato franceze janë duke bashkëpunuar për të finalizuar ekstradimin e tij.
Prokuroria e Shkodrës ka caktuar masën “Arrest në burg” ndaj Hebovijës, dhe procedurat për ekstradimin e tij janë në vijim.
Hetimet, të realizuara në bashkëpunim me Europol dhe policinë e Shkodrës, kanë provuar se Hebovija, së bashku me dy bashkëpunëtorë të paidentifikuar, tentuan të vjedhin argjendarinë e shtetasit Mithat Çaku në Shkodër, ku gjatë tentativës, vëllai i pronarit, Ruzhdi Çaku, u plagos lehtë.
Hebovija ishte shpallur në kërkim ndërkombëtar pas ngjarjes, dhe u arrestua në Spanjë pas rikthimit të hetimeve.
Ai rrezikon një dënim nga 10 deri në 20 vjet burg, ndërsa nëse ekstradimi nuk realizohet, procesi gjyqësor do të vazhdojë në mungesë.
