Një ditë më parë u vu alarmi në vend se një i moshuar kishte hyre me bidon me benzinë në shërbimin e dializës në Korçë dhe paralajmëronte se do t’i vinte zjarrin. Por sot ai ka folur vetë dhe ka treguar si ka ndodhur në të vërtetë ngjarja dhe situatën absurde me të cilën përballen pacientët që janë të detyruar të marrin këtë shërbim.
Kujtim Mero ka deklaruar në një intervistë televizive se situata është e sajuar nga mjekët dhe e vërteta është ndryshe.
“Këto janë shpifje, se unë nuk kam arritur në atë fazë, siç mendojnë ata dhe siç më bëjnë mua të çmendur. Se po të jetë për të çmendur, mund të jenë ata dhe unë jo, se unë e kam aq logjikë, se po shkoj 70 vjeç dhe nuk gaboj në ato gjëra. Unë nëse kam ndonjë inat personal mund ta bëj me vetë personin”, tha Mero.
Më tutje ai shprehu pakënaqësi ndaj spitalit, pasi sipas tij, nuk ka marrë shërbimin e nevojshëm.
“Brenda janarit kam 3 seanca minus, që nuk e kam marrë. Dje u sajua ky muhabet, ishte e përgatitur, ishte kurth, që unë të debatoja. Ndërsa unë ndihesha shumë i qetë. Ata e kishin përgatitur”, tha ai.
Mero shtoi se të enjten ka shkuar për të bërë seancën e dializës, ka kërkuar t’i ndërrohet makineria pasi nuk punonte mirë dhe për këtë ka pasur debat. Sipas tij, as policia nuk i gjeti lëndë djegëse kur shkoi në spital. Ai shprehu pakënaqësi ndaj spitalit, pasi sipas tij, nuk ka marrë shërbimin e nevojshëm.
Sakaq, vlen të përmendim se skandale të tilla me këtë shërbim që është marrë me koncesion nga Spitali Amerikan, me pronar Klodian Allajbeun nuk kanë të mbaruar. Një vit më parë ka qenë KLSH e cila ka zbuluar abuzimet dhe neglizhencën që bëhet nga koncesionari, por edhe nga qeveria.
Përveç se tregoi që kontratat për këtë shërbim iu hiqte të drejtën disa qytetarëve që të bënin pastrimin e gjakut, KLSH theksoi se prej 7 vitesh qeveria nuk kishte bërë asnjë kontroll se si po zbatohet kontrata.
Sakaq, ditën e djeshme Gazeta Reforma ka evidentuar edhe njëherë se kjo situatë vjen si pasojë e një kalvari abuzimesh që ka bërë Allajbeu me koncesionin e dializës. Ku theksojmë se prej vitit 2015, qytetarët janë detyruar të marrin këtë shërbim në ambientet e Spitalit Amerikan, që në vend të përshpejtonte procesin iu ka krijuar atyre më shumë zvarritje. Nuk mund të harrohen apo të kalohen kaq lehtë nga qeveria ato pamje skandaloze kur dializën qytetarët e merrnin në korridoret e spitalit . Nuk mund as t’i shmangen përgjegjësisë ish-ministrja e shëndetësisë Ogerta Manastirliu dhe as ajo aktualja Albana Koçiu.
