Kuvendi i Kosovës është mbledhur sot për të pestën herë me synimin për të konstituuar legjislaturën e nëntë, por pa arritur sukses. Lëvizja Vetëvendosje vazhdoi të këmbëngulë për një marrëveshje politike lidhur me zgjedhjen e kryetarit të Kuvendit.
Nënkryetari i LVV-së dhe deputeti i zgjedhur, Glauk Konjufca, ritheksoi se partia e tij propozon sërish deputeten Albulena Haxhiu për postin e kryetares së Kuvendit. Megjithatë, ai theksoi se, duke qenë se ajo nuk arriti të sigurojë votat në seancën e kaluar, emri i saj nuk duhet të rikthehet në votim pa një marrëveshje paraprake politike.
Pasi u bë e qartë se mungonte konsensusi, kryesuesi i seancës, Avni Dehari, vendosi ndërprerjen e saj dhe njoftoi se ajo do të vijojë të mërkurën, në orën 10:00.
Vetëvendosje nuk arriti të sigurojë zgjedhjen e Haxhiut as në seancën e 19 prillit, duke thelluar ngërçin institucional.
