Dita e dytë e protestës në mbështetje të popullit palestinez në sheshin “Skënderbej” është shoqruar me tensione dhe arrestime. Policia e ka ndalur në në fillim grumbullimin, ndërsa disa persona janë shoqëruar në komisariate. Qytetarët janë shfaqur të revoltuar nga ky reagim, ndërsa njëra prej tyre, shtetase turke, e ka quajtur policinë fashiste.
“Jam turke unë! Dua të flas turqisht. Turp të keni! Polici fashiste! Haram iu qoftë!”, dëgjohet qytetarja të thotë në video.
Protesta në mbështetje të popullit palestinez ka nisur ditën e djeshme, ku disa qytetarë u mblodhën në shesh për të shprehur solidaritetin e tyre, ndërsa situata ka qenë e qetë dhe nuk ka pasur ndërhyrje nga policia.
Kujtojmë që shteti shqiptar është pozicionuar krah Izraelit në konfliktin e armatosur që është rindezur në Lindjen e Mesme. Për këtë qëndrim, kryeministri izraelit Benjamin Netanyhau ka shprehur falenderimet e tij edhe publikisht.
Të paktën 188 njerëz, përfshirë 55 fëmijë dhe 33 gra, janë vrarë në Rripin e Gazës gjatë javës së kaluar. Më shumë se 1,200 të tjerë janë plagosur. Në Bregun Perëndimor të okupuar, forcat izraelite kanë vrarë të paktën 13 palestinezë. Izraeli ka raportuar 10 të vdekur, përfshirë dy fëmijë.
Këshilli i Sigurimit i Kombeve të Bashkuara takohet të Dielën për të diskutuar shpërthimin më të keq të dhunës në vite në Palestinë dhe Izrael.
