Presidenti i Këshillit Evropian (KE), Charles Michel, ka deklaruar ditën e sotme se Turqia nuk e ka zbutur qëndrimin e saj ndaj Greqisë dhe paralajmëroi se BE-ja do të konsiderojë sërish vendosjen e sanksioneve ndaj Ankarasë zyrtare.
“Unë mendoj se loja e maces dhe miut duhet të mbarojë”, ka thënë kreu i KE-së, Michel, duke iu referuar provokimeve të përsëritura të Turqisë në ujërat greke.
“Ne do të kemi një debat në samitin e Bashkimit Evropian më 10 dhjetor dhe ne jemi të gatshëm të përdorim mjetet që kemi në dispozicionin tonë”, ka thënë kreu i KE-së.
Në periudhën e fundit, Turqia ka sfiduar Greqinë në Mesdheun Lindor, duke dërguar vazhdimisht një anije kërkimi të gazit në ujërat greke.
Të dyja vendet janë anëtare të NATO-s dhe aleanca ka ngritur një “mekanizëm” për të ndihmuar ushtritë rivale që të shmangin përplasjet aksidentale.
NATO strukturoi edhe një ndërmarrje diplomatike të kryesuar nga Gjermania për çështjet midis Ankarasë dhe Athinës, mirëpo kjo iniciativë ka treguar pak rezultate në zgjidhjen e problemeve thelbësore.
Greqia dhe Franca, po ushtrojnë veçanërisht presion në union, për të kritikuar më shumë dhe për të ndërmarrë veprime më të ashpra ndaj Turqisë.
Ndërkohë shumica e vendeve të tjera të BE-së, janë treguar më të kujdesshme dhe diplomatike në këtë çështje.
Disa prej vendeve anëtare, po frikësohen se rritja e tensioneve dhe përshkallëzim i raporteve me Turqinë, mund të provokojë presidentin turk Recep Tayyip Erdogan, që të lejojë edhe një valë të re refugjatësh që të dynden drejt kufijve të BE-së./GazetaReforma.com/
