Ditën e sotme Komisioni i Ligjeve po diskuton 55 firmat për shkarkimin e presidentit Meta. Ky i fundit anuloi para disa ditësh anulimin e zgjedhjeve, duke firmosur edhe live dekretimin e tyre.
Mbledhja është shoqëruar me debate mes deputetit të LSI-së në Kuvend, Ralf Gjonit dhe deputetit socialist Spartak Brahos.
E ndërsa ishin duke diskutuar ngritjen e një Komisioni për të vlerësuar edhe shkeljen e bërë nga presidenti Meta, debati mes Gjonit e Brahos ka përfunduar në fyerje personale.
Gjoni i ka kërkuar ndihmë kreut të Komisionit Manjës për të kontrolluar edhe fjalorin e anëtarëve të tjerë.
Debati mes Ralf Gjonit e Brahos:
Ralf Gjoni: Sipas Kushtetutës Presidenti shkarkohet nëse kryen një shkeljë të rëndë apo krim të rëndë. Kush e përcakton se çfarë është shkelja e rëndë sepse nuk e kuptoj?
Juristët na e kanë ndritur. Unë nuk jam pro dekretit të presidentit sepse besoj që për të shfuqizuar dekretin e parë është i pabazuar në Kushtetutë. Unë besoj se institucioni që mund të vlerësojë është Gjykata Kushtetuese.
Spartak Braho: Ne sot nuk jemi mbledhur për të filluar një procedurë, e cila do të konstatojë nëse është shkelje e rëndë. E kupton këtë që të them apo jo. I dashur Ralfi, dekreti i presidentit nuk është llastik për të mbathura, që mund të të hapet sa herë dhe sa të duash.
Është shtyllë dhe neni 92/2 thotë Presidenti i Republikës dekreton zgjedhjet. Nuk ka më as çdekret as njoftim, as vendim. Cdekretimi që ai ka paraqitur nuk parashikohet fare në Kushtetutë.
Ralf Gjoni: E kuptoj shumë mirë, më mirë se ty zoti Braho
Spartak Braho: Le ti japim mundësi parlamentit të nisë procedurën ta hetojë situatën. Ishalla presidenti nuk e shkelur rëndë që të shkarkohet por për mendimin tim shkelja është e rëndë megjithatë të ngrihet një komision hetimor.
Mund të bëj thirrje që ti të jesh anëtar i atij komisioni dhe ta shikosh me sytë e tu që presidenti e ka shkelur rëndë Kushtetutën. Në përfundim unë bashkohem me konkluzionet që relatoi edhe zoti Fino dhe le t’i hapim rrugë komisionit hetimor.
Ralf Gjoni: Unë e kuptoj shumë mirë mo. Ka mundësi? Kontrolloni anëtarët e komisionit si flasin. Nuk jemi në komunizëm. Zoti Braho mbaroi komunizmi. Me të njëjtën mendësi juriste në 1990 ju kaluat 7501 dhe i morët të drejtën e pronësisë çdo qytetari shqiptar.
Mos na bëni arrogancë juridike. Po mos mu drejto mua . Nëse ke problem me presidentin adresoja presidentit. Mos u merr me mua. Edhe fjalët kursej. Kujdes se nuk je prokuror. U përdor një fjalë fyese këtu. Kontrolloni anëtarët.
