Partia Demokratike ka vijuar me denoncimet për tenderat sekretë të qeverisë.
Nëpërmjet Sekretarit të Përgjithshëm, Gazment Bardhi, PD akuzoi qeverinë për një tender për blerjen e letrave higjienike dhe kartopecetave për të sëmurët me COVID-19, të cilin e kanë konsideruar sekret.
Sipas PD, fakti që një tender i tillë konsiderohet sekret, do të thotë se është bërë me shifra stratosferike.
Bardhi i ka bërë thirrje SPAK, që të dalë nga karantina dhe të fillojë hetimet.
Kujtojmë se më herët PD ka denoncuar tenderat për respiratorët, maskat mbrojtëse dhe kitet për testime, të cilat sipas të djathtëve janë blerë me çmime disa fish më të larta sesa tregu.
“Nuk u ngopën duke vjedhur me maskat për mjekët, me testimet për qytetarët, me respiratorët për më të goditurit nga virusi, pajsije që i kanë blerë deri në 4 fishin e çmimit të tregut, por janë vërsur deri aty ku nuk ia pret mendja askujt- tek letrat higjenike. Më dëgjuat shumë mirë. Kanë klasifikuar sekret blerjen e letrave higjenike për të sëmurët me COVID dhe stafin mjekësor. Janë plot 10 tendera të rinj të zhvilluar në datë 18 Prill, që Qeveria i ka klasifikuar përsëri sekret. Është e paimagjinueshme që mes ketyre kontrateve sekrete janë dhe tenderat për blerjen e letrave higjenike me procedurë sekrete, letrat e duarve dhe kartopeceta. Jam i sigurtë që çdokush që po e dëgjon këtë tani nuk u beson veshëve. Por vendimi i qeverisë së Edi Ramës, i publikuar mbrëmë në fletoren zyrtare, nuk lë vend për asnjë hamendje. Letrat higjenike për të sëmurët me COVID dhe stafin mjekësor që kujdeset për ta janë shpallur sekret. Mjerim më të madh për një qeveri nuk mund të ketë. Ka arritur deri aty sa një procedurë që përdoret për interesin thelbësor të shtetit, atë të sigurisë kombëtare, e përdor për të mbuluar, me siguri, vjedhjen e radhës me tenderin sekret të letrave higjenike”, u shpreh sekretari i përgjithshëm i PD ndër të tjera.
