Para nuk bëhen vetëm me PPP multi-milionëshe ose me tenderë rrugësh apo aeroportesh. Në sistemin e “Rilindjes” nëse ke lidhjet e duhura, para mund të bësh edhe me tenderë të “vegjël” që nuk bien në sy, por që kapin vlera prej miliona eurosh.
I tillë është edhe tenderi që po ju tregojmë sot, ai për lavanderinë e Spitalit Rajonal të Vlorës, i cili u fitua me një ofertë e barabartë me 98.5% e fondit limit, ku dy nga tre konkurrentët në garë, nuk kishin paraqitur vlerë ekonomike.
Tenderi pra, u fitua nga kompania “Davis” sh.p.k, për një shifër prej 182.5 milionë lekësh të reja, pa TVSH (rreth 1.7 milionë euro me TVSH), në mungesë të dukshme të konkurrencës, por edhe të interesit për këtë procedurë.
Spitali Rajonal i Vlorës shpalli në 10 shtator 2020, procedurën për “Shërbimi i Lavanterisë dhe Hotelerisë”, për një periudhë 48-mujore, me fond limit 185. 250.786 lekë.
Në përfundim të procedurës, rezultoi se, kishin aplikuar për këtë tender 3 operatorë ekonomikë, “Davis” sh.p.k, “Univers Service” dhe “W. Center”.
Nga tre konkurrentët, vetëm “Davis” kishte paraqitur një ofertë ekonomike.
Ndërsa dy të tjerët, u skualifikuan pasi, siç shënohet nga Agjencia e Prokurimeve Publike (APP), nuk kanë paraqitur ofertë ekonomike.
Referuar vlerave të cituara në njoftimin e APP-së, rezulton se oferta e “Davis” shpk është shumë pranë fondit limit, rreth 1.5% më e ulët sesa shifra maksimale e caktuar nga Autoriteti Kontraktor, Spitali Rajonal i Vlorës.
Tenderët që përfundojnë me ofertë fituese fare pranë fondit limit si dhe me oferta shumë pranë ose shumë larg njëra-tjetrës klasifikohen në legjislacionin ndërkombëtar të prokurimeve si të dyshimta.
Udhërrëfyesi i Bankës Botërore mbi “flajmujtë e kuq” në fushën e prokurimeve publike, e rendit si tregues të mjaftueshëm për të ngritur dyshime faktin nëse ofertat e hedhura në garë janë në mënyrë të pashpjegueshme tepër pranë fondit limit ose tepër larg, p.sh., më pak se 1% ose më shumë se 10%.
Diferenca mes dy ofertës fituese dhe fondit limit është vetëm 1.5%.
Po kështu edhe udhërrëfyesi i Bashkimit Europian mbi Mashtrimet në Prokurimet Publike rendit afrimësinë e ofertës fituese me fondin limit si një arsye për të ngritur dyshime.
/Burimi: Boldnews.al/Përshtati: GazetaReforma.com/
