Teksa temperaturat kanë shënuar shifra rekord në vendin tonë, kreu i Emergjencës Kombëtare, Skënder Brataj për “News 24” këshilloi qytetarët të tregohen të kujdesshëm veçanërisht në orët e pikut. Mjeku Brataj theksoi se temperaturat e larta janë të rrezikshme për të gjithë por veçanërisht moshat e treta duhet te tregohen më shumë të kujdesur. Ai shtoi se është e domosdoshme që në këtë situatë qytetarët të konsumojnë rreth 2 litra ujë në ditë. Brataj u shpreh se çdo temperature mbi 30 gradë konsiderohet me potencial rreziku edhe nëse ne ndodhemi në hije.
“Çdo temperaturë mbi 30 gradë në hije është e rrezikshme. Është e domosdoshme që të kufizohet dalja në orët e pikut”, u shpreh ai.
Gjithashtu Brataj ndër të tjera tha se edhe të rinjtë dhe po ashtu edhe ndaj fëmijëve duhet të tregohet kujdes në këtë sezon të nxehtë veror.
“Nga data 17 e deri sot janë 2715 vizita të bëra në banesë, po ashtu edhe shumë konsulta telefonike. Ne kemi mjekë që bëjnë edhe konsulta mjekësore përveç urgjencës. Nëse mjeku ka dyshimin më të vogël për rrezik jetë, dërgon ekipin në vendngjarje. Gjatë stinës së verës shtohet koordinimi dhe forcat në vend”, ka thënë ndër të tjera ai.
