Drejtuesi i këshilltarëve të opozitës në Këshillin Bashkiak të Tiranës, Dorjan Teliti, foli me tone të forta gjatë protestës sot, duke deklaruar vendosmërinë e tyre për të vazhduar luftën deri në realizimin e qëllimeve të tyre. “Kjo bashki mbyllet me zinxhirë se nuk kanë kurajo të përballen me shkeljen që kanë bërë,” theksoi ai, duke akuzuar bashkinë për mosveprime ndaj shkeljeve të pretenduara.
Teliti shtoi se ata janë të vendosur të qëndrojnë aty çdo javë: “Ne nuk tërhiqemi, do të qëndrojmë këtu çdo javë gjer në arritjen e objektivit, vendosjen përpara drejtësisë të atyre që kanë kryer aferat korruptive.” Ai shprehu angazhimin e tyre për të mbrojtur interesin e qytetarëve, duke cituar betimin që kanë bërë: “Jemi betuar në Kushtetutë dhe flamur se mbrojtja e interesit të qytetarëve është misioni ynë i vetëm.”
Teliti theksoi gjithashtu qëndresën si një detyrë për të ndaluar abuzimin me të ardhmen e fëmijëve dhe përmendi se Tirana dhe Shqipëria do të vazhdojnë të luftojnë deri në dorëheqjen e kryetarit të bashkisë, Erion Veliaj, dhe të kryeministrit Edi Rama, të cilët i akuzoi si bashkëfajtorë për situatën e vështirë në të cilën ndodhet qyteti dhe vendi.
