Mbrëmjen e sotme kreu i Urgjencës Kombëtare Skënder Brataj, teksa po fliste rreth shërbimit të 127 gjatë epidemisë tregoi se gjatë periudhës së fillimit të pandemisë së koronavirusit, personeli i 127-ës ka marrë kërcënime e sharje të shumta.
Në një intervistë për “Open”, Brataj u shpreh se kur në një pallat kishte rezultuar një qytetar i prekur, drejt numrit të Urgjencës kishin shkuar shumë thirrje telefonike që shkonin deri te kërcënimet për vrasje.
Sipas tij, një prej banorëve të pallatit kishte thënë se ishte gjyqtar dhe do të ndiqte personalisht personelin e Urgjencës nëse nuk shkonin të merrnin të infektuarin.
“Kur kishim ndonjë rast pozitiv në një pallat, merrnin gjithë banorët e pallatit dhe kërcënonin. Njëri thoshte jam gjyqtar, hajde merreni (të infektuarin) se do t’ju ndjek penalisht. Ka pasur kërcënime nga më të ndryshmet. Kuptohet nga sharjet deri te vrasjet. Më thuaj kush je se do të vras. Jo vetëm mua, por gjithë personeli mjekësor”, tha Skënder Brataj, shefi i Urgjencës Kombëtare.
Ende nuk dihet shumë rreth këtij kërcënimi, por sikundër përmendi edhe Brataj, kjo përkon me një periudhë stresi, kur njerëzit ishin të painformuar rreth Covid-19.
