Mbrëmjen e 18 marsit, Tirana do të tronditej nga një ngjarje e rëndë e ndodhur në rrugën “Zef Jubani” në zonën e Tiranës së Re, ku 26-vjeçari Jurgen Kurti, një emër jo pak i njohur për drejtësinë, do të ekzekutohej në hyrjen e pallatit ku banonte nga një breshëri automatiku.
Por teksa policia e Tiranës vijon hetimet për identifikimin e autorëve, vëmendja është rikthyer edhe njëherë në një ngjarje po kaq të bujshme në të cilën Kurti u përfshi thuajse një vit më parë.
Në prill të 2018-ës, 26-vjeçari së bashku me babanë dhe dajën e së fejuarës së tij, Kostandin dhe Kujtim Ekonomi, u arrestuan për vrasjen e një tregtari në Durrës, 58-vjeçarit Agim Arapi.
Siç ka dëshmuar dhe bashkëshortja e viktimës, konflikti mes palëve nisi për një qira që Kurti dhe vëllezërit Ekonomi i detyroheshin Agim Arapit, pasi tubat e ajrimit të picerisë së tyre kalonin në dyqnin ushqimor të Arapit. Debati mes tyre ka degjeneruar në dhunë dhe pasi u godit me sende të forta, Agim Arapi ndërroi jetë.
Por pavarësisht se në kamerat e sigurisë të publikuara në media nga bashkëshortja e viktimës, Vjollca Arapi, shihet qartë prania e Jurgen Kurtit në vendngjarje i cili hyn e del nga dyqani me qepena të mbyllur ku po dhunohej Arapi (video min. 11:20), ky i fundit vetëm u arrestua e më pas u la i lirë, pasi përgjegjësinë për krimin e morën vëllezërit Ekonomi.
Praktikisht i njëjti skenar që u ndoq dhe në vrasjen e të atit të Kurtit në vitin 2017. Asokohe, i riu u arrestua me akuzën e vrasjes, por u la në arrest shtëpie nga gjykatësja Etleva Deda pasi përgjegjësinë për krimin e mori daja i tij, i cili kishte ndërhyrë për të mbrojtur nipin dhe të motrën nga ish-bashkëshorti i saj, Artur Kurti pasi ky i fundit kishte shkuar në shtëpinë e tyre pas disa kërcënimeve.
Mirëpo, në rastin e vrasjes së tregtarit në Durrës, hyn në lojë prokurori Bledar Bejko, i cili me veprimet e tij të dyshimta, është bërë në njëfarë mënyre shkak për vrasjen e 26-vjeçarit mbrëmjen e 18 marsit.
Ndonëse pamjet filmike mbrëmjen që u vra Agim Arapi tregonin qartë Kurtin në vendngjarje e madje dhe në brendësi të dyqanit ku ai u dhunua për vdekje, prokurori Bejko nuk e pa të arsyeshme të ngrinte asnjë akuzë ndaj tij, duke e lënë të lirë dhe rrjedhimisht, të arritshëm për ata që sot janë ekzekutorët e tij.
Në kontradiktë të plotë me vendimin e tij është dhe deklarata që ka bërë në seancën e parë gjyqësore ku është shprehur: “Ka dyshime që ka qenë i pranishëm dhe Jurgeni.” Në këtë seancë, ai akuzoi vetëm vëllezërit Ekonomi për “vrasje me paramendim, në bashkëpunim” dhe kërkoi burg për dy të arrestuarit, por asnjë akuzë për 26-vjeçarin, çka ngre dyshime të forta për favorizim dhe standart të dyfishtë.
Këto dyshime theksohen edhe më tepër në seancën e dytë ku përveçse akuza e prokurorit Bejko për të arrestuarit u shndërrua nga “vrasje me paramendim” në “vrasje nga pakujdesia”, Jurgen Kurti nuk u thirr në gjykatë as si dëshmitar i ngjarjes.
Palë me prokurorin duket se është bërë dhe mjeku ligjor, i cili siç ka treguar Vjollca Arapi, ka nxjerrë dy raporte për vdekjen e bashkëshortit të saj. Në raportin e parë, në hapësirën e shkakut të vdekjes shkruhet “Vdekje nga mjete të forta mbase” dhe vendi i vdekjes është “në dyqan ose rrugës”.
Ndërsa në raportin e dytë, shkruhet “Vdekje e menjëhershme me sulm të papërcaktuar” (duke lehtësuar dukshëm të akuzuarit nga përgjegjësia) dhe as nuk përcaktohet vendi i vdekjes, të cilin mjeku përgjegjës ka refuzuar ta plotësojë edhe pas kërkesës së Vjollca Arapit, e cila nuk bënte dot çregjistrimin e të shoqit në gjendjen civile.
Kështu për vrasjen e Agim Arapit, Kujtim Ekonomi po vuan dënimin me 5 vite burg, ndërsa Kostandin Ekonomi u la i lirë pas 3 muajve burg nga gjykatësi Paulin Çera ( i njohur për refuzimin e ekstradimit të bosit të drogës Alket Hatija në Itali). Por ai që e pësoi më keq këtë drejtësi të çalë që u kthye në efekt boomerang, krahas familjes Arapi, ishte vetë Jurgen Kurti, i cili fare mirë sot mund të ishte në burg duke kryer dënimin dhe jo i shtrirë në një arkivol.
