Në një kohë kur Coronavirusi ka alarmuar të gjithë globin, shkencëtarët kanë zbuluar një virus misterioz, i cili nuk është parë ndonjëherë deri tani, në një liqen në Brazil.
Ky virus quhet Yaravirus dhe ka marrë emrin e një sirene, e cila sipas gojëdhënave mashtronte ushtarët për t’i futur në ujë e më pas i mbyste.
Yaravirusi nuk lidhet me asnjë virus tjetër në botë dhe 90 për qind e gjeneve të tij nuk janë parë kurrë më herët, duke shkaktuar goxha habi tek shkencëtarët.
Ky virus u dokumentua në janar, kur u zbulua në liqenin Pampulha, pranë qytetit Belo Horizonte, në mënyrë krejt të papritur.
Pasi analizuan ADN-në e tij, ekspertët gjetën 74 gjene, nga të cilat vetëm gjashtë ishin regjistruar më parë në literaturën mjekësore.
Studimi u krye në Universitetin Federal të Minas Gerais-it, teksa shkencëtarët besojnë se Yaravirusi është rasti i parë i izoluar i një grupi të panjohur të viruseve amebale.
Nga ana tjetër, Coronavirusi deri më tani vijon të përhapet me shpejtësi, duke shkaktuar mbi 1020 viktima, ndërsa 43 111 persona janë të infektuar në shkallë globale.
