Pak minuta më parë kryeministri Edi Rama ka publikuar një grafik, ku sipas tij tregohet numri i vdekjeve për 1 milionë banorë në Shqipëri dhe në vende të tjera.
Rama shkruan se të gjithë të gjithë ekspertët kudo në botë, bëjnë thirrje për të mos e ulur vigjilencën dhe asnjë qeveri në botë, nuk ka një plan hapjeje pa shkallë dhe se në vend do të vijohet të zbatohet plani që është vendosur dhe do ketë ndryshime në varësi të zhvillimve në frontin e luftës.
Kreu i qeverisë shkrehet se ekonomia bie e ngrihet prapë, por të vdekurit nuk ngjallen më, prandaj të gjithë duhet ta kenë të qartë që qeveria nuk do të tërhiqet nën asnjë presion të padijes.
POSTIMI I PLOTË
VDEKJET PËR 1 MILIONË BANORË tregojnë qartë se sa vendimtare kanë qenë shpejtësia, rreptësia dhe respektimi masivisht i masave në Shqipëri Të gjithë ekspertët kudo në botë, bëjnë thirrje për të mos e ulur vigjilencën dhe asnjë qeveri në botë, nuk ka një plan hapjeje pa shkallë, në varësi të kurbës!
Ne do të vazhdojmë të zbatojmë planin tonë dhe ta adaptojmë atë sipas dinamikës së zhvillimeve në frontin e luftës për mbrojtjen e jetës. Ekonomia bie e ngrihet prapë, të vdekurit nuk ngjallen më, prandaj të gjithë duhet ta kenë të qartë që ne nuk do të tërhiqemi nën asnjë presion të padijes, mendjelehtësisë e vulgaritetit, të atyre që nuk duan të kuptojnë thelbin e kësaj situate dhe flasin për diktaturë e për lloj – lloj fantazish jashtë këtij realiteti krejt të pazakonshëm.
Deri tani në vendin tonë janë 518 të infektuar, 26 viktima dhe 277 të shëruar.
Gjatë 24 orëve të fundit janë konfirmuar 24 raste të reja me Covid-19, mes tyre 6 personel mjekësor, teksa ka humbur jetën një 64-vjeçare në Tirana, e cila ndodhej në intubim.
