Pamje të tjera vijnë nga masakra që po kryhet mbi lumin Mat, në shtratin e të cilit, kompania “Salillari” dhe “Ndue Kola Mountains” po kryejnë punime.
Në videon e publikuar nga Dosja.al shihen se dy kompanitë në fjalë kanë zbarkuar kamionët dhe ekskavatorët në shtratin e lumit Mat dhe por kryejnë punime, duke e gërryer dhe duke marrë rërë e zhavorr nga ky vend.
Gërryerja në shtratin e këtij lumi për të marrë rërë dhe zhavor ka bërë që rrjedha e tij të devijohet, duke shkaktuar edhe eriozion në tokat bujqësore të banorëve të kësaj zone, duke sjellë sërish rrezikun e përmbytjeve në dimër.
Teksa, qeveria iu bën thirrje shqiptarëve të qëndrojnë brenda duke shmangur grumbullimet e shumta, shumë kompani po ushtrojnë veprimtarinë e tyre pa kriter në terren, duke shmangur edhe protestat e qytetarëve.
Disa ditë më parë banorët e zonës kanë dalë të protestojnë kundër këtij projekti në dëm të mjedisit shqiptar, por sipas dëshmive që ata kanë dhënë për media të ndryshme, rezulton se Policia i ka kërcënuar me gjoba, pasi po thyhen rregullat ndaj pandemisë.
LEXO: Premtimet në raport të kundërt me realitetin! Salillari dhe Gjikuria ‘gllabërojnë’ malet e lumenjtë
Kujtojmë se “Salillari shpk.” është akuzuar nga opozita për shkak të projektit të ‘Unazës së Re’ në Tiranë, pasi u shpall një nga tre kompanitë fituese për ndërtimin e 2.2 kilometra rrugë (nga pallati me “Shigjeta” në Tiranë deri te sheshi “Shqiponja”), në vlerën 40 milionë euro.
Opozita, por jo vetëm, e kanë akuzuar kreun e ‘Salillarit’ për lidhje të ngushta me qeverinë e Edi Ramës dhe duke e cilësuar si njeriu që bën ‘bamirësitë’ e kryeministrit.
Nuk e dimë nëse firma në fjalë ka përfituar nga raporti miqësor që ka me qeverinë, apo ka ndërhyrë pa leje mjedisor nga ana e saj.
Sa më shumë është folur për mjedisin, aq më shumë është dëmtuar natyra.
Si ministri i Turizmit dhe Mjedisit Blendi Klosi, ashtu edhe kryeministri Edi Rama janë angazhuar për ndalimin e masakrave natyrore, por realiteti është krejt i ndryshëm.
Shoqatat mjedisore kanë mbi dy vjet që zhvillojnë procese gjyqësore dhe një seri protestash për të ndaluar ndërhyrjet pa kriter në mjedis, por puna vazhdon me shpejtësi, duke dëmtuar rëndë natyrën.
Nga ana tjetër, janë rreth 15 skrepa të firmës “A.N.K.” dhe firmës “Bardhi Konstruksion”, që kanë shqyer e po vazhdojnë të shqyejnë 22 kilometër shtrat të lumit Mat, në 6 zona me 12 qëndra nxjerrje zhavorr e rërë.
Kompania nuk është e pajisur as me leje shfrytëzimi e as me leje mjedisore, teksa Ligji nr. 111 datë 15.11.2012, ndalon shfrytëzimin e shtretërve të lumenjve për 30 vite.
Volumet që janë shkulur nga lumi Mat, janë më të larta se kodrinat e zonës Fan-Rubik-Milot-Shënkoll, madje buzë rrugës kryesore, ka krijuar disa varg-male në afro 4 kilometër gjatësi, 1 kilometër gjerësi e 20-30 metër lartësi.
Sipas Komitetit të Baseneve Ujore, Drejtorisë së Baseneve të lumit Mat me qëndër në Lezhë dhe Agjencisë Kombëtare të Mjedisit që prej 3 janarit 2014; në Shqipëri nuk është dhënë asnjë leje, për nxjerrje inertesh në shtretërit e lumenjve.
Madje, janë revokuar edhe 1139 lejet, që ishin dhënë me afat deri më 31 dhjetor 2021; ku firma e Ndue Kola kishte 37 leje nga lumi Tapizë-Tiranë, në lumin Ishëm, lumin Zezë në Fushë Krujë e deri në Klos-Burrel.
Pyetja që lind në këtë rast është se kur ligji e ndalon një veprim të tillë, si është mundur që Ndue Kola, vazhdon gërryen dhe shkatërron shtratin e lumit Mat?
