Një sondazh i kryer nga “Friedrich-Ebert-Stiftung” me 680 të rinj të moshës 14-29 vjeç në Shqipëri gjatë periudhës shkurt-mars 2024 ka nxjerrë në pah tendencën e lartë të dëshirës për emigrim mes të rinjve shqiptarë.
Rezultatet treguan se mbi 36% e të rinjve që nuk kanë jetuar më parë jashtë vendit synojnë të largohen, sidomos vajzat e reja.
Nga këta, 11% planifikojnë të largohen brenda 6 muajve. Faktorët kryesorë që shtyjnë të rinjtë drejt emigrimit janë standardet më të larta të jetesës dhe kushtet më të mira të punës.
Më shumë se 28% e atyre që duan të largohen nuk mendojnë të rikthehen sërish në Shqipëri.
Studimi theksoi se arsimi është cilësuar si një ndër çështjet më të rëndësishme për të rinjtë, veçanërisht përballë sfidave të Revolucionit të Katërt Industrial dhe ndikimit të Inteligjencës Artificiale. Shumë prej tyre e shohin studimin jashtë vendit si mundësinë më të mirë për t’u përgatitur për tregun global të punës.
Problemet sociale dhe shoqëria e polarizuar
Studimi evidenton gjithashtu se të rinjtë në Shqipëri përballen me dhunë, kriminalitet dhe një mungesë besimi te institucionet, veçanërisht ato të drejtësisë. Shoqëria shqiptare vijon të jetë e polarizuar për shkak të kapitalizmit të paorganizuar dhe mungesës së rregullave të qarta, ku statusi social përcaktohet nga fuqia ekonomike dhe jo nga kontributi vetjak.
Pavarësisht sfidave, të rinjtë vazhdojnë të besojnë te aftësitë e tyre për të sjellë ndryshime, edhe pse kjo mbetet më shumë një vetëdijësim sesa një veprim konkret për transformimin shoqëror./Monitor
