Ministri i Mbrojtjes së vendit tonë, Niko Peleshi është shprehur për mediat se Ballkani Perëndimor është një rajon i brishtë për shkak edhe të konflikteve në gjithë botën. Sipas tij vendi ynë duhet të jetë vigjilent edhe pse Shqipëria ka mbrojtjen e NATO-s.
Peleshi i tha këto fjalë gjatë një aktiviteti për rekrutimin e të rinjve në Forcat e Armatosura, në qytetin e Shkodrës. Kujtojmë se edhe në buxhetin e ri të shtetit, parashikohen më shumë fonde për ushtrinë dhe mbrojtjen e vendit tonë.
“Jemi të mbrojtur në tokë det, hapësirë. Mbrojtja është bërë prioritet për shkak të konflikteve në gjithë botën dhe për faktin se jemi në mes të një rajoni të brishtë. Shqipëria është mes të Ballkanit Perëndimor dhe fati mirë është se jemi anëtarë të NATO së bashku me tre nga 6 vende anëtare ose pjesë të këtij rajoni.
Gjithsesi konfliktet e rajonit tonë të brishtë janë të lidhura padyshim me situatën e përgjithshme në botë. Ndaj duhet të jemi me vigjilent dhe të përgatitemi për me të keqen dhe shpresojmë për më të mirën. Dy janë pikat me të nxehta të rajonit, veriu i Kosovës dhe Bosnjë Hercegovina për shkak të Republikës Serbe.
Është e paprekshme Shqipëria, është e paprekshme NATO është forca më e madhe ushtarake dhe politike në botë, por gjithsesi duhet të përgatitemi dhe të shtymë përpara procesin e integrimit të Ballkanit Perëndimor në BE. Vetëm integrimi i gjithë Ballkanit Perëndimor në NATO dhe BE është garancia për një stabilitet të qëndrueshëm afatgjatë”, tha Peleshi.
