Rusia nuk ndalet, pas hapjes së luftës me Ukrainën tashmë kërcënon një vend tjetër.
Bosnja dhe Hercegovina mund të pësojnë fatin e Ukrainës, nëse bashkohen me aleancën ushtarake të NATO -s, ka deklaruar një zyrtar i lartë rus.
Kjo deklaratë “bombë” u dha të të enjten, ku ambasadori i Rusisë në Bosnje dhe Hercegovinë, Igor Kalbukhov, u shpreh se vendi ishte i lirë të bënte zgjedhjen e tij në lidhje me NATO-n, por paralajmëroi se Kremlini do të “përgjigjej”.
“Nëse Bosnja dhe Hercegovina vendos të jetë anëtare e ndonjë aleance, kjo është një çështje e brendshme. Përgjigja jonë është një çështje tjetër”, tha ai për Ftv.
Ndërkohë që sipas Ambasadës së Shteteve të Bashkuara të Amerikës në Sarajevë këto deklarata janë të rrezikshme, të papërgjegjshme dhe të papranueshme.
“Asnjë palë e tretë nuk ka fjalë në marrëveshjet e sigurisë ndërmjet NATO-s dhe vendeve sovrane. Ne do të vazhdojmë të qëndrojmë me vendosmëri në krah të Bosnjë-Hercegovinës, ndërsa ajo ndërmerr hapat e nevojshëm për të siguruar vendin e saj në komunitetin euro-atlantik të kombeve” shkruan Ambasada Amerikane në Twitter.
Kujtojmë që të paktën një raketë ruse goditi një vendndodhje në Lviv herët të premten, sipas kryebashkiakut të qytetit Andriy Sadovyi.
Deri më tani, qyteti piktoresk në Ukrainën perëndimore është kursyer kryesisht nga bombardimet e pamëshirshme të forcave ruse.
