Nëntë gjimnazistë përfunduan të helmuar dje në gjimnazin e Shupenzës në Bulqizë.
Shkak për helmimin u bë gazi që ishte hedhur në klasë.
Në një intervistë për ‘Faxweb’, infermierja që u kujdes për nxënësit, tregoi se ata kishin qëndruar për një orë në klasë.
Mësuesja nuk i ka lënë të dalin, derisa gjendja e tyre është përkeqësuar.
Nxënësit u paraqitën në spital me të vjella, dhimbje barku dhe të përziera.
Infermierja shprehet, se derisa të dalin rezultatet e analizave, klasa do të qëndrojë e mbyllur.
“Fëmijët erdhën tre të parët këtu, kishin probleme me frymëmarrje kishin dhimbje koke, të përziera. Ia matëm tensionin. Kishin rrahje zemra të larta. I nisëm në Peshkopi. Erdhën edhe katër të tjera ato i çuam në Bulqizë. Filluam mjekimin, njëra ishte më keq. Erdhën edhe të tjera. Nëna e njërës prej tyre tha se kishte dhimbje barku edhe të vjella. Kanë ardhur këtu edhe pasi kanë shkuar tek shtëpia. Kanë ardhur të tjerë edhe pas 9 të parëve. Fëmijët thanë se pasi ishin futur në klasë pas pushimit, ishin ndjerë keq. Mësuesja kishte qenë duke bërë mësim dhe i kanë kërkuar ta dalin jashtë por ajo nuk i kishte nxjerrë se kanë rregullat e veta. Kanë qëndruar për një orë brenda. Dikush thoshte që i dhimbte koka, dikush thoshte se i vinte për të vjellë. Derisa të dalin përgjigjet e analizave klasa do të qëndrojë e mbyllur“, tha infermierja.
